Inyo bang nasayran, nga ang Pilipinas usa sa kanunay nga bisitahan sa bagyo? Busa dili na kita angay nga mahibulong pa niini kay ang atong nasod, anaa nahimutang nag-atubang sa kinalapdan ug kinalawoman nga lawod sa Pacifico.
Kung mao, unsaon man nato ang pag-ila, nga mahimong bangis ang bagyo?
Tungod sa kakulang sa pagsabot sa bagyo, matarantar dayon kita kun may kusog nga hanging mohaguros sa atong palibot. Hinuon dili ta angayan nga magkiyugpos lang kun ingon na niini ang atong mabatyagan.
Kalma lang apan alerto kun unsay angayang buhaton nga malikayan o mapanagan-an ang sitwasyon nga dili mahiagom unya sa di damhon sa kakalit nga kadaot. Samtang mangandam, ablihi ang inyong TV o ang inyo bang radyo.
Kun moingon na gani ang PAG-ASA nga; “Tropical Depression”, ang dautang panahon nagbaton sa hangin nga may gikusgon nga 55 kilometro kada oras hangtud sa 64 kph. Kun “Tropical Storm” gani, nagbaton kini sa hangin nga 65 kph. hangtud sa 119 kph. Kun ang dautang panahon mokusog pa ang hangin sa 120 kph. hangtud sa 185 kph., matawag na ni nato nga “Tropical Typhoon” ug kun mosaka pa gyud sa 186 kph. kini mahimong hingpit nang “Super Typhoon”.
Ato nang nasinati ang mga makalilisang nga bagyo dinhi sa atoa, nga naghatag og grabeng puwerhisyo o kadaot nga nagbilin og daghang kinabuhi nga nangamatay, sama ka mangtas sa mga bagyong Ondoy ug Uring.