Pagbasa og periodiko

Sumala pa sa usa ka survey nga gihimo adtong miaging tuig, gamay rang mga government officials ang mobasa og pamantalaan una sila moadto’g opisina sa buntag.

* * *

Matud pa sa usa ka retiradong opisyal sa Civil Service Commission (didto sa Manila) dili kini maayong attitude. Ug angay unta kuno nga usbon.

* * *

Lahi kini sa attitude ni kanhi Presidente John F. Kennedy sa Amerika. Si JFK (ang iladong inisyal sa ngalan ni Kennedy) suma pa sa iyang biographer, mobasa sa tanang morning dailies inig-mata gyud sa buntag.

* * *

Hatagan niya og importansya ang mga opinion columns ug letters to the editor sections. Gusto siya masayod sa pulso sa katilingban. Matud pa sa iyang biographer mga 60 porsiyento sa mga periodioco nga iyang madawat kada buntag iya nang nabasa inig-abot niya sa iyang opisina.

* * *

Mao kuno nga nahibaw-an na niya unsay nanghitabo sa nasud inig lingkod na niya sa presidential chair. Unta mao ning sundon sa atong mga dagkong opisyal sa gobyerno, lokal man o nasyonal.

* * *

Nahinumdom ko sa usa ka local official nga -- dugay na kadto -- nga misulti nga panagsa ra siya mobasa og periodiko kay usik sa panahon.

* * *

Bantug ra nga kining opisyala wala masayod nga nahitabo ang pagbuto sa bulkan Hibok-Hibok didto’s Camiguin.

* * *

TRIVIA. Maayong buntag sa atong mga higala diha sa mga kuwartel sa kapolisan ug kasundalohan. Salamat sa inyong suporta sa Banat News.