Kahadlok sa dagan

Sa imong pagbasa ini, nakadagan na ko sa Kapamilya Run. O nitalaw na sab. Kadaghan na ko mosuway og dagan sa una pang mga hugna ning tinuig nga lumba sa dagan nga among gipasiugdahan. Apan kanunay’ng nakakita og lusot sa di pag-apil. Abunda kaayo ko og mga hinungdan: Usa ko sa tagduma sa tibuok kalihokan ug dunay kaliboan ug usa ka mas mapuslanong gimbuhaton kay sa pagdagan.

Sa usa sa nangaging mga lumba, napugos ko pag-apil. Apan sa tulo ka kilometro lang nga fun run. Ug wa ko modagan. Igo rang nilakaw sa kinamub-an nga ruta. Kuyog sa akong asawa ug mga higala nga utro sang di ganahang managan.       

* * *

Ning higayona, ganahan na gyud kong modagan. O mosuway. Gipalitan ko sa akong asawa og sapatos para dagan. Pagkahibawo nako sa kamahal sa presyo, nisaad ko sa akong kaugalingon nga modagan na gyud.

Napalit ning akong sapatos usa ka tuig nang nilabay. Kada adlaw ni nakong gisul-ob. Apan wa pa gyud kong kadagan. Haom kaayo alang sa akong inadlaw nga paglakaw gikan ug paingon sa bay ug trabahoan. Ang kabaga sa tumbanan kanunay hinuon nga nipahinumdom nako nga ang mas dakong kapuslanan sa sapatos mao ang pagdagan. Nahadlok kong madugta na lang ni, sama sa nangagi nakong mga sapatos, nga di gyud makatilaw og dagan.

* * *

Maong nagpalista ko sa Kapamilya Run karong tuiga alang sa unom ka kilometro nga kategoriya. Di tungod sa panungog nilang Atty. Haide Acuña ug Vilma Andales nga mga beterana na sa daghan ug mas tag-as nga mga lumba. Di tungod sa padungug-dungog sa akong kaubanan nga mahimo kong mas epektibong modapit sa ubang mga tawo pagsalmot sa among lumba kun ako mismo mosuway sa pagdagan.

Human nakapalista, hunahuna ra nakoy nagdako nga mag-praktis. Aron maandam sa adlaw sa lumba. Apan wa gyud kong kahigayon. Di tungod sa ka way panahon. Dunay tingog nga naghunghong nako nga di ko kinahanglang modagan. Aron pagmatuod sa akong kaugalingon.

* * *

Maong nagsuwat ko ini, pila ka oras na lang sa di pang lumba, nga wa kahibawo ganahan bang momata og alas-tres sa kadlawon aron lang modagan. Wa pa gani masukod ang akong singlet kun makatabon ba sa akong tiyan. Unsaon na man lang kun nahilis nang akong sapatos sa inadlaw nakong baktas ug di na haom sa pagdagan?

Pagbundak sa uwan ug paghuros sa hangin nga hinungaw sa bagyong Butchoy, nalipay ko sa hilom. Duna na sab koy laing lusot sa di pagdagan. Kay kun mag-uwan atol sa Kapamilya Run, mas mapuslanon ko sa pag-atiman sa motumaw nga mga suliran kay sa pagdagan. Apan samtang nagsuwat ko ini, nahunong nang uwan ug nipakita nang adlaw.

Modagan? O di?

* * *

Email: [email protected].