Unsa na ni uy!

Unsa ning report nga miabot nako nga ang mga maestra sa kinder dinhi sa dakbayan wala pa masweldohi sa ilang sweldo para kaniadtong Febrero ug Marso?

Uy, kamong anaa sa Cebu City School Board palihug tan-awa ninyo ni kay dili baya sayon kun wala nay kwarta ang mga maestra. Maayo lang kadtong mga adunahan kay bahala na og madugay ang sweldo kay duna man sila’y pundo.

Nasayud ko nga daghan sa mga maestra nagsalig ra gayud tawon sa kinensena nila nga sweldo. Ang uban nabuhi kay duna may mga tindahan nga magpautang tungod kay nasayod nga makasweldo man g’yud. Apan adunay kinutoban ang pagpautang. Ang-ang man og sigi lang og pautang hangtud mahutdan na lang usab sa puhonan ang mga tindahan. May kaila ko nga maestra sa kinder mitug-an gayud sa kapait sa ilang kahimtang.

Mora’g makatoo sa sulti ni Vice Mayor Joy Augustus Young nga maisip nga pait kaayo karon ang Cebu City School Board office kay mora’g walay nag-manage. Makausa nangayo ko og pila ang nagasto sa mga tunghaan sa tubig ug kuryente.

Wala sila makahatag kay kuno mi-resign ang usa nila ka kauban. Pastilan, pagkahaguka nga tubag. Wala ko malimot nga atul nga ang School Board gidumala pa ni Young kaniadto, nangayo ko sa samang dukomento, diha dayon.

Ngano gud tawon nga wala man sila’y rekord nga apil man sa ilang trabaho ang pag-monitor hain sa mga tunghaan nga usikan og tubig ug kuryente. Pinaagi niini makahimo sila paghimo’g paagi nga dili kini magpadayon. Unya, kanang sweldo sa mga maestra nga moabut og tagpila ka buwan nga dili mahatag, siyaro na man usab. Gasalig lang mo kay up-to-date man ang sweldo ninyo diha sa City Hall mao nga dili kamo magtagad sa mga maestra?

Palihug, Konsehal Jose Daluz III kay ikaw may gitahasan ni Mayor Mike Rama nga modumala sa School Board, lihoka na tawon nga masulbad ang problema diha.

* * *

Matag adlaw anaa ko mag-agian sa Gorordo Avenue. Kanunay ko nga makakita nianang gipalapdan na nga kabahin sa Escario Street atbang sa Golden Peak Hotel. Dugay na kaayo kini nga gisemento sa kontraktor nga gikuha sa Department of Public Works and Highways (DPWH) apan ang problema kay ang mga poste nga kaniadto diha sa daplin sa karsada, anaa na karon mahimutang sa tunga human sa road widening.

Gipasagdan lang kini ug wala gayud atimana. Gidala nako kining maong isyu ngadto kang Mayor Michael Rama sa pamasin nga mapadali ang pagkuha sa maong mga poste, apan wala pa gihapo’y aksyon.

Unsaon, dunay kamandoan sa mayor nga dili dayon mapatuman kay ang iyang mga sinaligan nga gisugo malimot ra man. Abi ninyo, ako pa ang nagsulti sa usa sa mga executive assistant sa mayor nga siya ang gitahasan sa pakig-coordinate sa VECO aron makuha na ang maong mga poste. Kapila ra g’yoy pag-relay sa inpormasyon kay moderno na man ta karon apan dili lang gihapon dayon mahimo? Ang mayor usab nga daghan kaayo og mga problema nga giatubang labaw pa nga makalimot. Unsa na ni uy!

Kun makuha na gud ang mga poste nga anaa na karon taliwala sa karsada, magamit na ang Escario Street nga two-way kanang atubangan sa Golden Peak Hotel.

Pastilan, pagka karon ang nalipay kadto ra’ng nakapahimulos kay ang kabahin sa karsada nga gipalapdan apan wala gamita, gihimo ra nga parking area sa mga sakyanan.