Ang Motorcycle Helmet Act of 2009

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang Motorcycle Helmet Act of 2009 sa bulan sa Agosto niining tuiga labing siguro nga daghan gayod sa mga motorista ang madakpan sa mga Transportation Office (LTO) personnel nga ipahimutang sa kadalanan alang sa pagbantay sa RA 10054.

Kini mahitabo kun ang atong mga motorista daw magpakabuta bungol lamang sa pagsanong sa awhag sa atong kadaugan sa LTO 7 ug Department of Trade and Industry (DTI) nga gitahasan sa pagpatuman,

Ang DTI maoy motan-aw sa matag helmet nga gamiton sa mga motorista pinaagi usab sa ilang pagbutang og tatak nga maoy momatuod nga nag-agi na kini sa ilang buhatan pinaagi sa gibutang nga ilhanan nga Philippine Standard (PS) o aduna kini Import Commodity Clearance (ICC) ug ingon man gikan sa Bureau of Product Standards kon BPS.

Ang pagpatuman sa maong balaod sa atong kagamhanan ilang gitumong alang sa paghatag og tukmang kasiguroan sa mga motorista sa ilang ulo sa higayon nga makasugat kini og aksidente sa dalan uban sa giluwanan niining motorsiklo.

Sa maong balaod nga ipatuman maoy gilakip nga magsul-ob gayod og mga helmet ang giangkas niini nga naglakip sa mga backrider sa habal-habal nga nagbiyahe ngadto sa hilit nga mga lugar dinhi sa tibuok lalawigan sa Sugbo o sa silingang lugar sama sa Bohol, Negros, Dumaguete ug uban pa.

Gitumong ang maong balaod alang sa paghatag protection sa ulo sa matag motorista sanglit matud pa nila nga ang ulo sa tawo maoy labing kuyaw nga bahin sa lawas sa tawo.

Nunot niini ang mga personnel sa LTO maoy gihatagan sa pagpatuman sa maong balaod ug giabagan usab kini sa ilang mga deputized agent ug mga traffic enforcer sa lainlaing local government unit.

Dagko ang multa alang niadtong madakpan nga mo-tamper sa tatak sa DTI sa mga helmet gikan sa DTI nga naglakip sa P10,000 ngadto na sa P20,000 nga kantidad tungod kay kalapasan kini sa RA 7394 kon Consumers Act sa nasud.