Senior Citizens giatiman

Nalipay kaayo ko nga adunay mga opisyal sa kagamhanan nga nagpakabana sa mga tiguwang kon senior citizens.

Dinhi sa dakbayan sa Sugbo, kapin sa 52,000 ka senior citizens gipanghatagan sa City Hall og pasiuna nga tag P3,000 nga cash assistance. Dugangan kini og laing P2,000 unya sa Disyembre.

Walay problema ang mga senior citizens dinhi sa dakbayan kay bisan og kinsa ang modaug tali kanila ni Mayor Michael Rama ug Kongresista Tomas Osmeña anaa man gayud ang cash assistance.

Magkadaku gayud ang kantidad niini sa pagpanglabay sa mga tuig. Tingali kun moabut na ang panahon nga mahimo na ako nga kabahin sa maong grupo, daku-daku na ang cash incentives.

Pagka nindot kun ang tanang mga opisyal sa lainlaing local government units magpakabana gayud sa kahimtang sa mga senior citizens. Didto sa Valenzuela City, nabasa nako sa internet nga ingon usab niini ang pagtagad ni Mayor “Win” Gatchalian. Gipahimoan usab niya og Senior Citizens Center ang mga tiguwang didto nga kadtong mga walay kapuy-an adto moestar.

Dinhi sa dakbayan sa Sugbo, si Osmeña maoy nag-una nga mipahimo’g pagtoon kun mahimo ba nga hatagan og cash assistance ang mga senior citizens ug gipadayon kini dihang si Rama mibanos pagka mayor. Kamong ubang mga opisyal sa kagamhanan, sunda ninyo ang gihimo nila ni Osmeña, Rama ug ni Mayor Gatchalian. Kining klaseha sa mga tawo maoy angay nato nga paluyohan nga mahimong dagkong lider sa nasud.

 Makapatandog sa balatian ang gihimo ni Mayor Gatchalian nga gipahimoan niya og kapuy-an ang mga tiguwang nga walay kapuy-an didto sa Valenzuela City. Angay nga suportahan ang iyang kawsa mao nga awhagon nako ang ubang opisyal nga sundon ang mga maayo niya nga gihimo. Nakahinuktok ko nga nagbasa sa iyang mensahe sa internet. Angay gayud tuod nga pasidunggan ug respitohan nato ang atong mga apohan. Atong batasan sa mga Filipino nga atimanon ang mga tiguwang.

Kun aduna may mga anak nga wala magtagad sa mga tiguwang na nila nga ginikanan, tukma ang gihimo ni Mayor Gatchalian nga anaa ang kagamhanan andam nga mosapupo kanila.

Matud ni Mayor Gatchalian nga ang mga tiguwang kon senior citizens dili mga sagbot sa katilingban kun dili sila maisip gani nga mga bitoon sa atong kaugmaon.

* * *

Nalipay ko kay misuporta si Mayor Michael Rama sa akong awhag nga panipsan ang concrete center-island sa karsada atubangan sa Kapitolyo. Nakabantay mo nga makaduha na ka higayon nga gihisgutan nako kining maong isyu sa atong lindog sa Freeman ug sa Banat News? Natan-aw man gud nako nga makatabang sa pagpahapsay og gamay sa trapiko ang pagpanipis sa maong center-island.

Ang uban wala makasabot niining maong termino. Ang center-island mao kanang sementado nga gitamnan og mga kahoy taliwala sa karsada. Lapad kaayo ang center-island atubangan sa Kapitolyo. Nakit-an usab diay ni Rama ang maong problema diha. Inay nga panipsan, gusto pa gani ni Rama nga tangtangon gayud ang maong center-island ug pulihan ra og “imaginary islands” kanang marka nga sagad makita nimo nga anaa sa karsada.

Kun matuman ang tinguha ni Rama, aw maiban-ibanan gayud ang problema sa traffic diha ilabi na kun ang mga traffic enforcers motinuod pagpatuman sa balaud.