Unsaon pagpangayo og sustento

Daghan sa mga babaye nga napabuntisan maproblema gyud og gukod sa amahan sa ilang mga anak. Mao ni kasagarang nasinati karon sa kababayen-an nga mabiktima sa pasalig apan kun moresulta na wa gyuy amahan nga magpakita aron mopas-an sa ilang responsibilidad. Mao sab ni ang problema sa mga magtiayon nga magbuwag unya dunay daghang mga anak. Ang inahan intawon maoy maproblema unsaon sa pagpa-eskwela ug pagbuhi ang ilang mga anak human biyai sa ilang bana. Busa kining pangutana labot sa pagpangayo og sustento alang sa anak maoy atong tubagon karon.

Dear Atty.Divine,

 Maayong adlaw kanimo ug sa mga magbabasa ning mantalaan. Atty. usa ako sa tigsunud sa imong column. Ako si Mae 28 anyos taga Mindanao. Nagsulat ko nimu para magpatambag kung unsa akong angay nga buhaton ning amahan sa akong anak kay wala man maghatag ug suporta. Naa mi usa ka anak nga babae, 4 years old. Unya wala man siya mupadala ug suporta sa bata nga nag eskwela na karun sa daycare sa amua sa Mindanao. Ang amahan sa akong anak tua sa gawas nagtrabaho sa barko. Basi sa akong nahibaw-an ang iyang igsuon maoy nagdawatan sa iyang sweldo apan akong gisuwayan og tawag og text di man motubag. Ang akong pangutana atty.kung unsaon nako pagpangayo og suporta sa amahan sa akong anak nga wa na man gani siya motext o motawag kanamo sud na sa lima ka buwan. Palihug tambagi ko atty.divine ug dinhi nalang kutob daghan kaayong salamat. — Mae

Dear Mae,

Salamat sa imong pagsunod sa atong column. Ang una nimong buhaton mao ang pagpadala og demand letter ngadto sa amahan sa imong anak labot sa imong pagpangayo og sustento kaniya alang sa pagkaon, pagpa-eskwela og uban pang gastuhan sa inyong anak. Imo ning ipadala sa iyang trabahuan o sa iyang address dinhi sa Pilipinas ug mamahimo sab nga imong ipaagi sa iyang igsuon. Mas maayo nga moduol ka og abogado aron maoy mohimo sa imong demand letter. Kun di gihapon siya mosanong sa demand letter, mamahimo kang modangop sa korte aron pagpangayo og support sa inyong anak. Kun ang korte mopadala og summon ngadto sa amahan sa imong anak mapugos gyud na siya sa pag-atubang niini. Mas maayo nga imo sab nga i-timing ang pagpasaka sa imong petition for child support kun ania na sa Pilipinas ang amahan sa imong anak aron di siya makalikay ug mapugos gyud siya pag-atubang. Mao ni kasagaran nga gibuhat karon sa mga asawa og seaman nga mangayo og suporta sa ilang mga anak human sila biyai sa ilang bana. Hinaut nga nagiyahan ka ning akong tubag kun unsay angay nimong buhaton. Thank you and God Bless. — Atty. Divine

Dili sayon ang pagpangayo og sustento ilabi na kun ang tawo nga imong pangayuan magpa buta-bungol sa iyang responsibilidad. Kasagaran gyud sa maproblema niini mao ang mga babaye ug mga asawa nga maoy mamahimong inahan ug amahan sa ilang mga anak human sila biyai sa ilang bana.Didto sa Amerika bisan kun aduna silay divorce apan strikto kaayo silang mopatuman alang sa paghatag og support sa mga bata, ang mga Amerkano di gyud makalikay sa ilang tulubagon sa ilang mga anak kay ibutang gyud sa ilang Divorce Decree kun pila ang ilang ihatag matag buwan isip suporta sa ilang kanhi asawa ug mga anak ug kuhaon kini sa ilang sweldo o income nga gidawat matag buwan. Apan dinhi sa ato, gahi kaayo mohatag og suporta ang mga amahan ngadto sa ilang mga anak og bisan gani kun aduna nay Court Order alang sa Child Support pakyason pa gyud kini hinungdan nga ang mga bata intawon ang maapektuhan.