Padayon ang reklamo

Una ko kining lindog para sa mga vendor. Haom sa pagsunod sa tanan kay ang pagpaninda maoy kasagarang dangpan nga panginabuhi. Magsuki na ta ha...

* * *

Padayon pa gihapon ang reklamo sa mga vendors nga wala makauyon sa merkado sa Lagtang, Talisay. Walay hunong ang ilang mulo sa kaminos sa ilang halin. Gusto silang mobalik sa naandang puwesto sa Tabunok apan dili motugot ang kagamhanan sa Talisay. Tinuod gyud diay nga diha sa kalamboan daghang masakripisyo.

*   *   *

Maanad ra tingali ang mga vendors sa Lagtang kay motultol man gyud ang mga pumapalit. Aduna namay molahos nga mga PUJ ngadto sa bag-ong merkado. Daghan usab nga mga tricycle, trisikad ug habal-habal. Apan minos lang gihapon ang ilang kinitaan ilabina kay naay daghang naninda sa highway ug sa kadaplinan nga dili na molahos sa bag-ong merkado. Kamo bay naanad sa dagkong halin unya sa kalit mikunhod lalim ba...

*   *   *

Matang sa paglambo ang pagtukod og bag-ong merkado. Gitumong usab kini aron mahapsay ang trapiko sa Tabunok. Daghang mga negosyante ang nangulitawo sa luna sa daang merkado aron tukoran og mall o department stores. Kun mao kini, anaa gihapon ang kaapiki sa dagan sa trapiko. Dili hinoon magsakit ang tiyan sa gobyerno kay makadugang man sa kinitaan sa panudlanan bahalag minos og halin ang mga vendors nga tua sa Lagtang.

*   * *

Nagbagulbol ang mga tindera ug tindero’g karne. Dili na mangadto sa merkado ang mga konsumedor kay adto na mopalit sa mga mall ug department stores kay hamugaway ug bugnaw. Pun-an pa sa pagdaghan sa mga imported nga karneng baboy ug mga meat products nga barato kaayo. Dili lang gani ang mga vendor maoy naapektohan lakip na ang mga tag-iya’g piggery farm.