Mr. Barangay

BRGY PAHINA CENTRAL, CEBU CITY

 “Pwede ba diay pabalikon og trabaho ang kawani sa barangay bisag nasuta ni nga positive sa gihimong drug test? Inay nga papahawaon gihatagan man hinuon og maayong pwesto.”

BRGY POBLACION, SOGOD, CEBU

“Diri sa among lugar Sir kay lainlain lang nga mga illegal ang mitumaw labi na ning shabu nga gipamaligya, naa say namaligya diri gasolina gikan sa tanker namaligya og mga tiniti nga gasolina.”

BRGY BANILAD, CEBU CITY

“Paita ning among dalan paingon sa Rotunda nga gihimo naman nga parkinganan sa mga dyep maayong ipa-towing ni sila, gamay nalang hinuon kaayo ang karsada kuyaw sa disgrasya.”

BRGY LOOC, MANDAUE CITY

“Naunsa naman ning among lugar sir Jun nga ang mga estambay atbang sa UCLM nga mag sige man pangayo’g kuwarta sa mga estudyante unya ipalit ra ba ni nila’g shabu, kuyaw na kaayo ni sila kay mura naman og hold-up ilang gihimo.”

BRGY BULACAO, TALISAY CITY

“Wala man gyud pakabana ang among mga opisyal sa barangay bahin aning among sapa habig sa sitio Krusan nga gisigihan man og kubkob sa mga bas, grupo ni sa mga batan-on ang kanunay manguha matag gabii.”

BRGY LIBOO, RONDA, CEBU

“Pwerteng gubaa sa among karsada diri Sir kuyaw kaayo sa disgrasya sa mga sakyanan labi na sa mga motorsiklo, maayo unta nga hatagan nig pagtagad sa among mga opisyales sa barangay.”

BRGY SANGI, TOLEDO CITY

“Hangyo lang mi sa mga opisyal sa barangay sa among lugar nga hatagan nila’g kasulbaran ning lapok sa dalan padulong sa Tiza lahos na sa Grand mall, naproblema na kaayo mi ani Sir.”

BRGY LAGTANG, TALISAY CITY

      “Naghitak ang shabu sa Ilang-ilang sir Jun sa may Sta. Catalina Village wa gyod ni mahatagi’g aksyon tungod kay nagduda mi nga polis ra ang nagpaluyo ani, maayo untang imo ning mahatagan og aksyon.”

BRGY MABOLO, CEBU CITY

“Hangyo unta mi sir Jun sa among kapitan nga susihon ning videokehan atbang sa natasha kay mura mag suki na sa rambol lugara, mas maayo tingaling tagdon kini dayon kay naa na gipatay diha dapit.” 

BRGY SAN NICOLAS-PROPER, CEBU CITY

“Ask lang mi Sir kun pwede ba diay kuralon ang Taboan public market nga para man unta na sa publiko, ang ubang mga merkado publiko sa siyudad wa man kurala pero kini amoa sa Taboan kuralon man.”

BRGY JANDAYAN, JETAFE, BOHOL

“Ang akong papa sir Jun 73 anyos na karon pero hangtod karon wa gyod makadawat og benipisyo isip senior citizen unya pa daw inig-abot og 77anyos sila pwede makadawat, luoy tawon mga tiguwang na.”

BRGY POBLACION, TOLEDO CITY

“Grabe gyod kaangso sa Barba sports complex kay wa may klarong ihianan unya ang mga tawo sad bisag asa lang pagpatil-is, maayo unta nga butangan nag klaro nga ihianan aron dili manimaho.”

Alang sa inyong mga reklamo text lang sa 09071678643