Serbisyong medical makab-ot pa ba

Giduso karon sa ubos balay balauranan ang balaudnon nga maghimong pribado sa 26 ka mga tambalanan nga gipanag-iya sa nasudnong kagamhanan ug usa niini mao ang Vicente Sotto Memorial Medical Center nga nahimutang dinhi sa Sugbo. Pasiradoan usab ni Kongresista Tomas Osmeña ang Cebu City Medical Center nga gipadagan sa lokal nga kagamhanan sa dakbayan sa Sugbo.

Sila si Kongresista Marañon III sa Negros Occidental ug Golez sa Bacolod City gusto nga himoong pribado ang 26 ka mga tambalanang pangpubliko sa nasud aron mokita kini sa ilang operasyon samtang pasiradoan ni Kongresista Osmeña ang Cebu City Medical Center tungod sa dili maayong pagpadagan niini. Gusto sa kongresista nga ipanghatag na lamang sa mga barangay ang gahin alang sa tambalanan.

Kining maong mga kongresista ug ang ilang mga kauban sa ubos balay balauranan nga mosuporta sa ilang gidusong balaudnon mga nawong og kwarta. Ina kay maghuna-huna unsaon pagtabang ang mga kabus nga masakiton nga makapatambal sa dekalidad ug barato nga tambalanan, mao naman hinooy gihuna-huna sa mga kongresista ang pagnegosyo sa mga kabus. Ina kay librehon sa pagpatambal ang mga kabus himoon naman hinoon kini nilang gatasan.

Kun ugaling madayon ang paghimong pribado sa 26 ka mga pangpubliko nga tambalanan sa nasud, ang mga pasyenting kabus mamatay sa ilang pag-abot sa tambalanan tungod kay dili na sila atimanon ug dawaton kun walay ihatag nga pasiunang bayad. 

Samtang ang paghatag sa gahin sa Cebu City Medical Center ngadto sa mga barangay dili makahatag og maayong serbisyo ngadto sa mga masakitong kabus tungod kay gamiton lamang kini sa pamolitika ug mahimo ra usab unya nga pribado ang serbisyong medical sa kabarangayan sa Sugbo. 

Ang panglawas usa ka batakang panginahanglanon nga dili angayang ihikaw ngadto sa katawhan ilabi na gayod kanamong mga kabus. Mao unta kini ang huna-hunaon sa atong mga magbabalaud.