EDITORIAL - Ang pagminyo sa managsamang sex

Ang mga estado sa America ug ubang mga nasud nga miuyon nga kaslon ang mga managsama og sex maoy paghatag og respeto sa mga magbabalaod    sa maong mga lugar ngadto sa daghang populasyon nila nga mga mahuyang ug tomboy.

May puwersa ang gitawag nga third sex sa maong mga dapit nga kapiyalan kaayo sa mga politiko sa gikinahanglan nilang boto o suporta sa panahon sa ilang pamolitika.

Busa isip paghatag og tawhanong respeto, nagkasinabot ang mga politiko sa pagpanday og balaod nga mahimong magpakasal isip magtiayon ang lalaki versus lalaki, babaye versus babaye, bayot versus bayot ug tomboy versus tomboy sa ilang mga lugar.

Apan magpabilin ang kamatuoran nga ang maong balaod, tawhanon ug balaod sa mga politiko apan di balaod sa Dios nga maoy naglalang sa tawo.

Wa baya’y laing libro nga nasulatan sa lunsay nga mga pulong sa Dios gawas sa Balaang Kasulatan kon Holy Bible o Biblia.

Ang tanang balaod sa Dios nga gusto Niyang tumanon sa tawo sa yuta kaniadto ug hangtod karon anaa ra sa Biblia.

Gikan pa sa panahon ni Adan ug Eva , ang gisugo sa Dios nga magkaminyo mao ra gyud ang lalaki ug babaye, busa kun sa yuta may balaod man nga supak sa pagtulon-an sa Dios , nakasulat na usab sa Biblia ang hukom sa Dios kanila.

Mahimong way kalibotan bahin sa balaod sa Dios nga napatik sa Biblia ang mga magbabalaod nga nagmugna sa maong balaod ug lakip usab ang mga hingtungdang mga anaa sa grupo sa third sex wa masayud kun unsa kahigpit ang Dios bahin sa kaminyuon sa tawo.

Kay kun nasayud pa sila sa kamatuoran di nila mabuhat ang ingon tungod kay ang tataw nga pagsupak sa balaod Dios nagkahulogan sa kapeligro sa ilang kinabuhi inig-abot sa adlaw sa paghukom.

Nahisulat baya sa Biblia nga sa maong adlaw, duha ra ka lugar ang padulngan sa mga tawo, nga mao ang bag-ong langit ug ang impiyerno.

Hinuon sa mga wa magpakabana niini , way angay kabalak-an, apan ang mga nasayud niini labing magmabinantayon. Di ba?