Kinsa'y angay mabasol?

Leksyon sa publiko kadtong sunog diha sa Barangay Luz kaniadtong Biyernes sa hapon nga dili gayud maayo nga pasagdan nato ang atong mga silingan nga motukod og kabahin sa ilang balay ngadto na sa karsada. Naglisud ang mga trak sa bombero pagsulod sa dapit nga nasunog kay unsaon, gamay na lang kaayo ang access road. Tan-aw nako kamong mga opisyal diha sa Barangay Luz ug apil ang mga nasunogan angay usab nga mabasol sa hitabo.

Kun gireklamo pa ninyo ang abuso sa inyong mga silingan nga ang mga balay anaa daplin sa karsada, nagpabilin unta nga lapad ang access road. Unsaon, gawas nga mi-encroach ang kabalayan sa karsada, gibutangan pa og mga tapangko ang uban.

Suheto ko niini kay nakaagi ko diha sa maong dapit sa makadaghang higayon. Mao kini ang sagad talan-awon nga atong makita sa mga “thickly-populated areas” nga mangawat og luna ang anaa sa daplin sa karsada magpuyo.

Unsaon, duna unta kita’y mga opisyal sa barangay nga atong gipili aron molaban sa atong katungod apan daghan man usab ang wala magtagad ug wala makalantaw sa umaabot nga problema.

Sama ra sila sa mga sakop sa SPEED, ang demolition team sa City Hall, nga wala makasanta sa encroachment sa kabalayan diha sa T. Padilla Street gikan sa eskena Sikatuna.

Kaniadto, ang duha ka aseras sa T. Padilla Street kaagian pa sa mga tawo nga maglakaw, apan karon hain na man ang maong aseras? Suheto ko niini kay dihang nagtrabaho pa ko sa laing kompaniya, diha sa T. Padilla ang among opisina. Mao kini ang akong giingon nga kamong mga opisyal ug katawhan sa laing barangay, himoa ninyo nga leksyon ang sunog sa Barangay Luz. Kanus-a pa kamo molihok?

* * *

Angay g’yud tuod nga mag-andam daan og relocation sites ang atong mga opisyal sa kagamhanan aron kabalhinan sa mga apektado sa ongoing-demolition nga ilang ipatuman.

Mas maayong paspasan ni Mayor Michael Rama ang iyang Public-Private-Partnership (PPP) nga mapatuman ang gilatid sa Republic Act 7279, ang Urban Development and Housing Act.

Sama sa gihimo ni Valenzuela City Mayor Sherwin “Win” Gatchalian nga nakigtambayayong sa private sector ug napatukod gayud niya didto sa iyang dapit ang daghang housing projects.

Gani napasidunggan si Mayor Gatchalian ni Vice President Jejomar Binay nga maoy chairman sa Housing and Urban Development Coordinating Council tungod sa iyang proyekto.

Ang gihimo ni Mayor Gatchalian angay’ng sundon sa ubang mga chief executives aron masulbad ang ilang mga problema kun unsaon paghatag og housing projects sa apektado sa government-initiated demolition. Nakigtambayayong si Gatchalian sa San Miguel Corporation ug ubang magpapatigayon ug natukod gayud ang daghang housing projects didto sa ilang dapit.

* * *

Nahinumdom mo ni Joel Obenieta? Kadto bang traffic aide-1 nga gihimong canvasser kaniadto ug gibasol nga mipa-overprice sa pagpalit og pyesa sa sakyanan sa Department of Public Services (DPS).

Gibalik na man diay usab sa DPS nga gibalhin na man unta kadto. Karon anaa na usab siya madistino sa dispatching. Ang akong amigo diha sa DPS nakahukom na lang nga maoy mopasaka kaniya og kaso sa Ombudsman.

Atong paabuton.