EDITORYAL - China way puas sa pag-abusar sa Pilipinas

Ang China nalingaw kaayo og pagbarika og mga pagkaon ug tambal aron mapuo ang mga Filipino.

Unya lig-on man og lawas ang mga Filipino , ang butang niini mao na usay gisuwayan  kun di ba kini mosurender. Sa gipabrika nilang mga candy, may nabiktima mang mga Sugboanong estudyante , pero pipila ra ka buok.

Kadtong nakakaon sa White Rabbit candy nga may gisagol nga hilo nga laygay mao ray gisakitan og tiyan nga ang uban nadala gyud sa tambalanan pipila na ka tuig ang nakalabay.

Human masayri sa publiko nga may hilo ang maong candy, aw gipatuman niini ang market denial, buot ipasabot nga gilikayan na sa mga bata ang pagpamalit sa maong matang sa pagkaon. Maoy hinungdan nga kaniadto ang mga bata maoy maglaway magsud-ong sa maong mga candy, apan karon ang mga nagbaligya na usab   niini maoy naglaway sa kalagot nga wa nay mipalit sa maong baligya.

Gawas sa candy may mga baligya ang mga Insek nga imbis paguwapa , panggusbat diay sa dagway sa babaye .

Di lang kay pangguba sa dagway, pangpatay gayud ilabi na kadtong nakabaton gyud og kanser sa panit gumikan sa binuang nga   baligyang paguwapa sa mga Insek.

Daghan kaayong mga Chinese product nga gipamaligya dinhi sa Pilipinas nga nakadaot sa kinabuhi sa mga Filipino, apan wa mosaler kay imbis mokibra ang populasyon sa nasud misamot man hinuon ang pagsaka niini gumikan sa kakusog mopabrika og bata sa mga Filipino.

Tan-aw sa China nga di man mapiog ang kaisog sa mga Filipino, ilang suwayan ang maong kaisog pinaagi sa binarumbado nga pag-angkon sa Scarborough Shoal.

Bisan nasayud sila nga iya kini sa Pilipinas, gisuwayan nila ang inabusar o tinuyo ang pag-ilog niini aron sukdon ang katakus ug kaisog sa Pilipinas pagpanalipod sa katungod niini .

Karon nakita nga wa gyuy mahimo ang Pilipinas pagpakigsangka kanila, kay ang mga Filipino nahisama sa gamay nga bata nga nakigharong og hamtong nga tawo sa pagtuo nga may molaban kaniya, apan dihang nasuta nga wa gyud diay, aw igo ra gayud sa pagduko ug paawot ug nagpaabot nalang sa higayon aron hingpit nilang biyaan ang Scarborough Shoal nga isyu. Di   ba?