Ang plastik ug ang 2013 lokal eleksiyon

Ang nagpasad nga plastik  sa kadalanan  mao usab ang makaingon sa pag-awas  sa tubig ug mga pagbaha kay maalihan man ang dagayday sa tubig kun ipadpad kini sa atong mga kanal ug mga sapa.

Kun makasinati na og pag-awas ang  tubig sa atong mga kanal  ug  mga sapa maoy himoon sa mga lokal opisyal ang pagpanglimpiyo sa tuyo nga makuha ang nag-ali nga mga basura nga dili madunot ug madugta.

Daghan ang kagamitan sa plastik sama sa mga lingkoranan, gihimong balde, plato, planggana, baso ug gihimo na gani kining gihulip sa  tinuod nga bulak o mga tanom nga plastik nga gipahiluna sa sulod sa  panimalay, mga  pribadong buhatan o buhatan sa kagamhanan.

Ang plastik nga bulak o tanom kun imong tan-awon sa layo daw sama gayod sa tinuod ug  mahibaw-an lamang kini nga plastik kun imong duolon ug hikapon.

Daghan ang nag-ingon nga niining nagkaduol nga mga adlaw sa 2013 lokal eleksiyon maoy atong masinati ang pagtumaw usab sa mga politiko nga nagbaton og plastik nga kinaiya.

Ang mga politiko nga nagbaton sa maong kinaiya niining panahon nga nagkaduol ang mga adlaw sa piniliay   maoy ilang himoon ang pagpakita sa ilang pagka maayong tawo, mahigalaon ug  matinagdanon.

Sa higayon nga ato silang ikahinagbo  maoy ilang ipakita ang pagkamaabiabihon ug atong makita sa ilang panagway ang labing  maanindot nilang mga pahiyom, makiglamano bisan sa nagkahugaw natong mga kamot, moagbay ug  magpikpik pa sa atong abaga sa pagdani nga atong botohan ilang kandidatura.

 Ang maong matang sa kinaiya sa  mga politiko  temporaryo lamang nga gibatonan sanglit kun makuha na nila ang ilang gusto ug maglingkod na sa katungdanan  mobalik man ang tinuod nilang taras ug kinaiya nga pagkapalabilabihon ug sagad niini kanila lisod na kaayong pakigkitaan sa ilang mga buhatan.