Sa 76 ka nasud nga di Eninglis ang sinultihan, nasuta pinaagi sa survey nga nag-una ang Pilipinas sa ka-lareno manulti og Eninglis.
Buot ipasabot nga dako kaayo ang pagsaler sa nangaraan nang sistema sa edukasyon nga unom ka tuig ang elementarya, upat ka tuig ang high school ug upat usab ka tuig ang kolehiyo.
Apan wa kini hatagi og gibug-aton sa kagamhanan karon tungod kay gilusad niini ang K+12 nga educational system .
Sa K+12 may duha ka tuig nga kindergarten, pito ka tuig nga elementarya , unom ka tuig nga high school ug upat ka tuig nga kolehiyo.
Kining sistemaha maoy giingong gipraktis sa 75 ka nasud nga gilupig og Eninglis sa Pilipinas.
Busa tungod kay makigtupong na ang Pilipinas sa ilang sistema sa edukasyon karon, tataw kaayo nga di na mailog pa sa laing nasud ang kasamtangang dungog nga naabot karon sa mga Filipino ang kangilngig mo-eninglis niini bisan kinsay ikaatubang, ma-Amerikano man o bisan kinsang mga nasura sa kalibotan.
Sa kasamtangang sistema sa edukasyon di tiaw ang kadaghan sa mga drop out gumikan kay di makasugakod sa ginastohay ang mga ginikanan nga nag-ilaid sa kakabus.
Bisan gihatag sa goberno nga libre ang pagtungha sa elementarya, apan di baya makaikyas ang mga estudyante sa gastoonon nila sa mga project nga ipatrabaho kanila sa ilang mga magtutudlo.
Busa bisan nagtungha pa sa elementarya, mapugos ang ubang mga ginikananan sa pagpahunong sa ilang mga anak kay wala silay ikalahutay sa paggasto niini.
Sa laktod , samtang magkadugay sa ilang pagtungha , magkabug-at usab ang gasto sa mga ginikanan nga mosangpot sa kadaghan unyang mamiya na sa ilang pag-eskuyla. Gipasaligan sa kagamhanan nga inigkahuman sa high school makakita na og maayong trabaho ang usa ka estudyante, mahimo na kunong di nalang mopadayon sa kolehiyo.
Ambot kaha sa mga employer kinsa nagkinahanglan og mga aplikante nga gradwado sa kolehiyo nga may diploma unya imong isangka ang aplikasyon sa imong anak nga diploma lang sa high school ang hinagiban, kinsa kahay hatagan og prayoridad sa employer? Di ba?