Pamugas ni Palmares

Di ang nangangkon nga tag-iya sa luna. Kun dili ang iya rang abogado ang nagbuot-buot pagtanyag. Nga bayran ang gasto sa pagpahawa sa mga molupyo gikan sa San Miguel, Apas, Cebu City. Aron mamalhin ngadto sa relocation site nga mapilian sa Cebu City government. O tukoran sa mga molupyo kun mag-iyahay pagpangita og bag-ong sinugdanan.

Pagmatuod nga maggikan sa iyang kaugalingong bulsa ang kuwarta, gisaway ni Atty. Roberto Palmares ang iyang kliyente. Matud ni Palmares siya ang nitakilid sa tanang gasto sa 15 na ka tuig nga husay sa kaso. Gipasanginlan niya si Mariano Godinez nga wa motabang bisan sa pagpakopya sa mga dokumento nga gikinahanglan sa korte.

* * *

Usa ka adlaw human nipahibawo sa iyang P17 milyones nga tanyag, si Palmares nanawag na sab nako aron pagpahibawo nga iyang giusbawan ang tanyag ngadto sa P20 milyones. Tubag ni niya sa pasiunang reaksiyon sa mga molupyo nga gigamyan ra sa orihinal nga tanyag. Ug sa sumbalik nga tanyag ni Mayor Mike Rama nga mohatag siya og mas dakong kantidad aron magpabilin ang mga molupyo sa luna.

Matud ni Palmares apil na sa P20 milyones ang gasto sa mga molupyo paghakot sa ilang mga butang ug pagbayad sa ilang abogado. Apan nitataw nga ang tanyag kutob ra sa alas-5 sa hapon sa adlaw’ng Huwebes. Kay di siya mahimong magpaabot hangtod sa hangtod.

* * *

Nagkalainlain ang hubad sa tanyag ni Palmares: Una, aron mahawan sa labing daling panahon ang 4.7 ka ektarya nga luna; ikaduha, nga namugas-pugas si Palmares aron makuha na ang iyang bahin kun mahalin nang luna; ug ikatulo, nga lipatlipat ning tanan aron mabuak-buak ang Archangels Residents Mergence Inc. (ARMI), ang kahugpongan sa mga molupyo, aron nga mas dali silang palayason.

May laing hubad nga gitanyag si Kongresista Tomas Osmeña: Nga nahalin nang luna, ug nga kabahin ni sa konsabo nilang Palmares ug sa kadagkoan sa City Hall pagpanguwarta sa kalbaryo sa mga molupyo.

* * *

Mga abogado nipasabot nako nga di talagsaon ang transaksiyon tali nilang Godinez ug Palmares, nga ang abogado maoy moabaga sa tanang gasto ug igo na lang bahinan kun magdaog nang kaso ug kun mahalin nang yuta. Matud nila kasagaran 10% ang bahin sa abogado. Sa ato pa, kun P1 bilyon ang halin sa luna, P100 milyones ang bahin ni Palmares.

Sa ikaduha niyang pagtawag nako, nikumpisal si Palmares nga dugay na silang wa magkasulti sa iyang kliyente nga tua na magpuyo sa Manila. Nagduda siya nga mga anak ni Godinez ang nagsige og hulhog sa amahan. Nakapatumaw ni sa lehitimong pangutana: Kun mao nga di ingon ana ka-interesado ang nangangkon nga tag-iya sa luna, nganong si Palmares mas Godinez pa man kay ni Godinez? 

* * *

Email:  [email protected].