Dugay na nga nahimong dakong suliran sa atong katilingban ang nagpadayon nga pagkuyanap sa ilegal nga druags ug dugay na usab nga gihingusgan sa atong kagamhanan ang pagpasiugda og mga kalihokan nga gitumong alang unta sa paghatag na og tukmang kasulbaran.
Ang Philippine Drug Enforcement Agency (PDEA) nga maoy gitahasan sa pagpasiugda og kalihokan nga gitumong alang sa pagdakop sa mga nalambigit sa maong ilegal nga kalihokan ang giabagan usab sa uban pa nga ahensiya nga naglakip sa Philippine National Police (PNP) National Bureau of Investigation (NBI) ug uban pa.
Daghan ang mga gihimong operasyon sa PDEA nga mosangko sa pagkasikop sa mga tawo nga nalambigit sa maong ilegal nga kalihokan ug gisuportahan usab sa kapolisan, NBI ug labaw sa tanan sa atong mga opisyal sa kabarangayan.
Ang labing tinuod kun atong ukayon ang listahan sa maong mga ahensiya sa atong kagamhanan daw maoy atong makita ang hilabihan na kadaghan sa ilang nadakpan nga nalambigit sa maong ilegal nga kalihokan ug daghan na niini ang gipasakaan og kaso ug nangabalhog ngadto sa mangiob nga bilanggoan.
Ang hinungdan nganong gipaningkamutan sa atong kagamhanan nga masumpo ang maong matang sa ilegal nga mga kalihokan tungod kay natataw man nga ang si bisan kinsa nga magumon sa paggamit mosangpot man gayod sa pagkaguba sa sanag unta nga kaugmaon sa mga tawo nga nalambigit sa maong matang sa ilegal nga kalihokan.
Matud pa sa atong mga awtoridad sa mga pagpasabot nga paingon gayod sa hingpit nga pagkaguba sa maayong kaugmaon sa mga tawo nga nagumon sa paggamit sa ilegal nga drugas.
Kun dili maoy mamatay, madakpan ug mabalhog sa bilanggoan hayan nga mahimo kining kawatan, tulisan,manglugos o malambigit sa makalilisang nga pagpatay o uban pang matang sa dinagkong krimen.
Hinuon daghan usab ang nag-ingon nga mapakyas ang maong gihingusgang kampanya sa kagamhanan sa pagsumpo sa maong suliran kun wala’y pagpakabana ang mga molupyo ug labaw sa tanan ang atong mga barangay opisyal. (Romeo T. Limpangog)