Lapulapu "Pantawid" malampuson

Gumikan sa hingpit nga kooperasyon ug full support nga gihatag ni Mayor Paz Radaza ug sa mga barangay captain sa dakbayan sa Lapulapu, ang Conditional Cash Transfer Program ning dakbayan nagmalampuson, tapus sa usa ka tuig nga implementation.

Kini ang atong nasayran gikan nila ni Melissa Remorosa, City Link, ug sa tulo ka Parent Leaders-Beneficiaries gikan sa mga barangay Pusok, Punta Engaño, ug Maribago - sa ilang pag-guest sa Senior Citizens Hour sa dyRC sa miaging Sabado.

So far, ang nahatag nga cash transfer, sa tag-P300 monthly matag beneficiary, mikabat nag kapin sa P14million sa dakbayan sa Lapulapu, kini sa 19 sa 30 ka barangay ning dakbayan, uban sa 1,700 beneficiaries. 

Daku kaayog kaakohan ang mga Parent Leaders nga adunay 25 ngadto sa 30 ka sakop. Sila ang mag-monitor sa performance sa mga beneficiaries – kun mituman ba sa mga requirements sa programa, sama sa dili pagsugal ug sa dili pag-prenda sa cash nga nadawat. Sila usab ang mangulo kanunay sa mga kalihokan

Aduna kini silay mga notebook, diin ilang himoon ang simple bookkeeping, i-record ang mga gasto sa mga ginikanan, kun kini nagamit ba sa kabataan, ug wala ihuboghubog sa amahan o gipusta sa lotto. 

Aduna silay Monthly Development Session, diin ilang tukion ang overall performance sa mga beneficiaries ug sa mga parent leaders mismo, updated beneficiary system, strict compliance, grievance ug recording system.

Unsa may resulta? Less incidence of malnutrition, less dropout among school children, ug 100% enrolment - sa ato pa, ang mga children-beneficiaries nagtungha gyud. Ug regular na ang pagpa-check up sa Day Care Center. Dugang niini, ila nang na-felt ang empowerment ug concerned citizenship.

Matud ni Melissa, naikag kaayo sila sa programa gumikan sa kooperasyon nga gipakita sa kagamhanan sa Lapulapu. Ang tulo ka parent leaders, sila si Ma. Ofillia Bermudez, Roselle Lazarte, ug Fe Soliano, nag-sul-ob sa Pantawid uniform nga hinatag sa dakbayan sa Lapulapu. Misaad si Melissa nga kami si Nick Ampatin ug Vit Padilla, pangayoan mig uniform gikan ni Mayor Radaza.

Ang 58 ka parent leaders adunay P500 nga monthly allowance gikan sa dakbayan (lupig ang mga presidente sa senior citizens sa Cebu City). Dugang niini, ang mga barangay captain sa Pajo, Maribago, Looc, Marigondon, ug Buaya mihatag usab og allowances ngadto sa ilang mga parent leaders: ABC President, Leo Mercado (atong amigo – taga-Opon gud ta!), P4,000 alang sa upat nila ka parent leaders, ug laing P2,000 pang-snacks sa monthly meeting sa mga parent leaders;

Kapitan Joseph Pangatungan, P2,000 alang sa duha ka parent leaders; Kapitan Mateo Dungog, P1,00), usa ka parent leader; Kapitan Lucrecia Amores, P2,000 alang sa upat ka parent leaders sa tag P500; ug Kapitan Lauro Soroño, P1,500 alang sa tulo ka parent leaders, sa tag-P500. Pagkabuotan ining mga Kapitana!

Of course, congratulations nimo, Melissa, for a job well done. Perhaps, napakyas kini sa ubang mga dapit – but not in Lapulapu City. Pasalamat usab ni Mayor Paz Radaza (ang amo unyang uniform, Mayor), ug sa mga barangay captain, for their Pantawid support! Full support sad ni sila sa mga senior citizens!