Bakak sa mga oil companies

Dili katuhoan ang pangangkon sa oil companies nga alkanse sila sa negosyo maoy hinungdan nganong dili sila makapatuman og rollback sa gibaligya nilang mga produktong petrolyo dungan sa pag-us-os sa presyo sa lana didto sa world market.

Wala’y kapasikaran ang mga oil companies sa ilang pangangkon tungod kay ang ilang mga libro nga gilistahan sa ilang ginansiya dili man bukas sa paglili sa publiko.

Ang nakadaot pa gyud, kining administrasyon ni Pres. Noynoy Aquino kanunay lang nga nag-“Noynoying” – wala gyuy aksiyon batok niining mga oil companies nga nagpunay lang og pangilad sa mga Pilipino.

Hasta si Kongresista Mitos Magsaysay sa Zambales nga dinhi sa Sugbo niadtong miaging Sabado, nagtuo nga namakak ang mga kompaniya sa lana sa ilang pangangkon nga alkanse.

Kaniadto nga nagsaka og tag-$5 ngadto sa $15 ang matag baril sa lana sa kalibutanong merkado, dali kaayong nakapasaka sa presyo matag litro ang mga oil companies. Sa dihang miabot og $190 ang matag baril didto sa world market, miabot gyud og P55 ang matag litro sa gasoline.

Apan karon nga $103 na lang, gitagaan ra gyud intawon kita og .40 ngadto sa .50 sentimos nga rollback. Kun mopasaka tag-piso o dos gyud ang price hike, ug kun mopa-rollback, katunga ra gyud.

Pagka-paet palandungon!

Ang akong gingilngigan mao ang mga gasolinahan nga anaa maglagbas sa south highway gikan sa Talisay paingon sa Minglanilla tungod kay sama sa kanta sa choir nga nagtupongtupong ang ilang presyo. Kun ang usa P53.19 ang unleaded gasoline, ang atbang P53.20.

Ang Oil Deregulation Law gipasar aron makamugna og “competition” sa mga kompaniya sa lana. Kun adunay kompetisyon, siyempre mag-iyahay unta sila sa pagpa-ubos sa ilang presyo. Ug ang mga konsumedor unta ang mabulahan.

Apan unsang pagka-unsaa nga ang balaod gigamit naman hinuong taming sa mga oil companies batok sa reklamo sa publiko kay lagi dili sila mahimong i-regulate tungod sa Oil Deregulation Law. Mao nga bisan nagsabotsabot sila sa presyo, wala kitay mahimo.

Daghang mga magbabalaod nga ganahan na nga ma-review ang Oil Deregulation Law, gani daghang ganahan nga mabasura kining balaora. Apan wala ilista ni Noynoy ang House bill nga nangayo sa pagtuon og balik sa maong balaod.

Sa ato pa, si Noynoy ganahan nga magkamang kita sa kalisod mugna sa kahakog sa mga oil companies. Ang nakaparat pa gyud, ilaron lang kita nianang iyang PPP (pantawid pasada program) nga puwerte ra gyung gagmaya.

* * *

Nakakita na ko og kalahian sa trabaho sa duha ka kontraktor nga nang-aspalto sa Cebu South Coastal Road.

Dili lang nako hinganlan ang kontraktor, apan kadtong magsige og agi sa South Road Properties (SRP) makabantay usab niini.

Diha sa kurbadahon nga karsada gikan sa amihanan paingon sa Laray sinaw kaayo ang pagka-aspalto. Nindot kaayo ang dagan sa sakayanan. Maayo kaayo ang pagkatrabaho sa kontraktor nga nagtrabaho niini.

Apan kanang karsada nga naglagbas sa SRP paingon sa Kawit Point puwerte man bati-a. Hinuon wala pa gyud mahuman, pero murag nakakita na ko og kalahian kay ang karsada duol sa Kawit Point baluron man nga wala mama-ayo sa pagpison.

Kun nakabantay kamo, dako ra gyud og kalahian ang tinarbahoan sa karsada sa coastal road sa SRP habig sa siyudad sa Sugbo ug sa coastal road nga anaa na sa Talisay. Ang habig sa Talisay sukad pa kaniadto nga nindot ang karsada ug walay lubaklubak.

Apan kanang coastal road sa SRP tumong gyud sa Sugbu building sa Kawit Point sukad pa kaniadto nga puwerte gyud bati-a, ilabi na sa kurbadahon nga sukad kaniadto daghang motor nga mibalitok.