Nasulbad na ang suliran sa baha?

Daghan karon ang nag-ingon nga niining panahon sa ting-init daw naibtan usab og tunok ang atong mga opisyal sa kagamhanan kay nasulbad man ang nag-unang suliran nga ilang gisagubang sa miaging tuig nga mao ang kanunay nga pagbaha sa ilang mga sapa ug pag-awas sa tubig sa ilang mga kanal.

Ang mga dapit nga gihasol sa maong suliran nga nakaingon usahay sa atong kadagkoang opisyal nga walay kinatulgan sa paghunahuna og kasulbaran mao ang dakbayan sa Mandaue ug dakbayan sa Sugbo.

Nakasinati usab og susamang suliran ang uban pa nga mga dapit dinhi sa Sugbo sama sa dakbayan sa Lapulapu ug uban pa nga mga dapit niini apan dili gayod sama kabug-at ang maong suliran sa Mandaue ug dakbayan sa Sugbo.

Adunay nag-ingon nga ang mga opisyal sa maong duha ka dakbayan nga sila si Mayor Michael Rama ug Mayor Jonas Cortes managsama og giatubang nga suliran sa panahon nga kanunay ang kusog nga pagbunok sa ulan sama sa pag-awas sa tubig sa ilang mga kanal ug ang pagbaha sa ilang mga sapa.

Nag-una nga hinungdan sa maong suliran mao ang kagagmay sa mga kanal nga maoy hinungdan sa pag-awas sa tubig kay dili na man makasugakod sa gidaghanon sa bul-og sa tubig nga maoy hinungdan sa pag-awas ngadto sa kadalanan ug kabalayan. Ang laing hinungdan sa maong suliran mao ang pagpataka og labay sa mga basura nga masulod ngadto sa mga kanal ug ang nasagol nga mga plastic ug uban pang basura nga dili madunot maoy makabara sa dagayday sa tubig ug dugang pa gayod sa mga illegal nga estraktura sama sa mga balay nga gitukod nga nakahatag pa og kakuyaw sa kinabuhi sa mga nagpuyo.

Nunot niining maong kahimtang daghan karon ang gibati og kabalaka nga niining panahon sa ting-init posibleng mataligam-an sa atong kagamhanan ang maong suliran ug kadtong gipanghiklin nga mga informal settler adunay posibilidad nga mamalik og tukod sa ilang balay taliwala sa mga sapa nga laing suliran na usab nga atubangon sa atomg mga lokal opisyal. (Romeo T. Limpangog)