EDITORYAL - Uniporme sa sundawo giukay-ukay

Daghan kaayong ukay-ukayan ning dakbayan sa Sugbo nga namaligya og mga uniporme sa sundawo ug polis sa barato kaayong presyo.

Daghang nagduda nga ang namaligya sa maong mga uniporme mao ang mga sundawo ug polis nga sugarol ug palahubog

Busa tungod kay wa morespeto ang maong mga otoridad sa ilang uniporme, gipahimudsan nalang usab sa mga ultimong sibilyan sa pagpalit ug sa pagsul-ob aron ikapanghambog usab nila sa di nila kaila ug suod nga sa makausa sa ilang kinabuhi nahimo silang polis o kaha sundawo.

Ang uban samtang magsul-ob kun mamustora og maayo hing-aan usab nga sundawo o kaha polis nga tinuod sa ilang kinabuhi.

Apan kun iuran-oran nalang sa magsul-ob nga magkamuritsing lang ang dagway, way kaligo nga way sapatos ug motindak sa sikad-sikad aw nabarato gyud pag-ayo ang maong uniporme.

Sa pagkatinuod di baya angayang bugal-bugalan ang maong uniporme

Kay ang makasul-ob lang unta niini mao kadtong mga tawo nga kwalipikado sa pagka- sundawo ug pagka-polis .

Busa di tiaw ang ilang sakripisyo, gikan sa tukmang edukasyon nga gikinahanglan, pangutok ug kabus-ok sa panglawas ilang gihalad una sila makasul-ob sa maong matang sa biste.

Apan kun ila kining ipasul-ob sa mga tawong ultimo nga wala makatunob sa mga lugar nga nakapakwalipikado kanila sa katungdanan busa nakasul-ob sila sa maong uniporme, ila lang giyatakan ang kasagrado sa maong uniporme ug wa nila hatagi og dakong bili ang kahalangdon sa tawong angay mosul-ob niini.

Busa kun dakpon man ang mga sibilyan    nga moyaga-yaga sa pagsul-ob sa maong uniporme, angay unahon sa pagsilot kadtong mga tinuod nga sundawo ug polis nga wa magmahal sa maong uniporme.

Ang ilang pagpasaya-saya sa pagladlad sa maong uniporme ug mitugot nga isul-ob sa mga tawong wala makatilaw sa sakripisyong ilang naagian, usa ka pagyatak nila sa ilang katungod ug pagbugal-bugal sa ilang kaugalingon. Di ba?