Sa pagdagsang sa mga pasahero sa terminal ug pantalan

Midagsang na karon sa pagdagsang ang mga pasahero sa mga terminal sa North ug South Bus Terminal ug mga pantalan dinhi sa Sugbo sangit niining higayona daghan man ang mamauli sa ilang tagsa-tagsa ka mga lalawigan sa tinguha nga sa maong mga dapit nila saulogon ang paghandum sa kamatayon ni Ginoong Jesukristo. Nunot sa maong pagdagsang sa mga pasahero ang mga tinugyanan sa kagamhanan nga gitahasan sa kahapsay ug luwas nga pagbiyahe ang higpit usab nga nagpahimangno sa pagmabinantayon aron kalikayan nga mabiktima sa dautang elemento o makasinati og kalisod sa ilang pagbiyahe.

Ang mga tinugyanan sa paghatag og kasiguroan ug luwas nga kakulian sa pagbiyahe sa kadalanan mao ang buhatan sa Land Transportation Office (LTO) 7 pinaagi sa pagpakatap sa ilang mga sakop sa pagsiguro nga dili malapas ang mga lagda nga gilatid sa kadalanan. Ang kasagaran nga mahimong kalapasan sa mga drayber sa ilang pagmaneho sa sakyanang pasaheroan mao ang overloading sanglit daghan man usab ang mga pasahero ang mamugos sa pagsakay bisan kun naghinubra na sa gitugot nga gidaghanon sa mosakay nga pasahero.

Dugang nga kalapasan nga mahimo sa mga publikong sakyanan panahon nga daghan ang pasahero mao ang pagpausbaw sa plitehan nga dili na mosubay sa gitugot nga kantidad sa Land Transportation Franchising and Regulatory Board (LTFRB) ug ingon ang pagbiyahe sa dili na nila rota ug wala usab mokuha og special permit nga maoy naghatag sa pagtugot niini. Samtang sa mga pier area maoy masinati ang naghuot usab nga pasahero nga magkinagang sa pagdala sa ilang mga kargamento nga maoy hinungdan nga gipatuman usab sa mga awtoridad sa maong lugar ang pagbantay pinaagi sa pagsiksik sa gidala nga mga bagahe.

Dugang pahimangno sa Coast Guard mao ang pagpaminaw sa nagtinguha sa pagbiyahe sa mga balita gikan sa Pagasa sa pagsiguro sa maayong panahon ug kalikayan ang trahedya sa kadagatan niining higayona.(Romeo T. Limpangog)