Gilbert Bargayo anha magpalansang sa Duljo

Sulod sa pila ka tuig nga pahulay ni Gilbert Bargayo, magpalansang na usab kini karong tuiga sa siyudad sa Sugbo ug ning higayona anha sa barangay Duljo.

Si Kapitan Elmer Abella sa barangay Duljo nagkanayon nga paninguha sa usa ka pamilya nga nanag-iya sa Kristal D Hardware sa dalan Spolarium, Duljo ang kahimoan sa "Buhing Kalbaryo Pagpalansang sa Krus 2012" sa Duljo.

Matud ni Abella nga mitabang usab niini si Mayor Michael Rama ug kanhi DOTC Undersecretary Totol Batuhan. Apan ang nag-organize niini mao ang konseho sa barangay Duljo pinanguluhan ni Abella ug iyang mga kagawad nga sila si Ricardo Ycong, Jenkjin Cabanit, Roel Abelgas, Vonjing Alicaya, Moises Alvares, SK chairman Jenkin Cabanit Jr., kalihim Chrismarie Ompad, tresurera Nicolas Teofilo.

Ang rason nganong wala makapalansang si Bargayo sa miaging mga Mahal nga Adlaw mao ang kawalay sponsor.

Dili baya lalim ang magpalansang, apan walay modumala sa magpalansang bisan sa samad nga maangkon niini sa mga kamot ug tiil. Naanad na si Bargayo sa paghalad sa iyang kaugalingon, apan kun walay kaseguroan iyang kaugalingon inig human sa pagpalansang, kuyaw man usab kini. Busa, kinahanglan ang sponsor.

Ang Buhing Kalbaryo nahimo nang naandan nga tulomanon sa mga Pilipino, ilabi na kanatong mga Sugboanon.

Adunay mga lugar nga ang Katapusang Pito ka mga Pulong ang pagabatbaton sa mga magtutuo.

Sama sa barangay Cadulawan, aduna kini pagahimuong pagbatbat sa "Katapusang Pito Ka Pulong ni Cristo" anha sa Kapilya sa Kang Aning sa Cadulawan.

Kining maong kalihukan gipaninguha kini    ni Police Supt. Alexander Abadinas, uban ni Kapitan Boboy Geonzon, pamilyang Ababon ug Abadinas, ilabi na ni Tonyo Ababon ug kaparyentihan.

Kining inyong alagad maoy mobatbat sa "sermon" sa dili pa magsugod ang katapusang pito ka pulong ni Kristo.

* * *

Panahon karon sa paghinulsol, mga panghinaot nga ang mga politiko mogamit niini dili alang sa ilang politikanhong laraw sa sunod tuig nga eleksiyon.

Daghan sa mga politiko ang walay puangod nga mogamit sa Semana Santa alang sa pagpasikat.

Mao kini ang giawhag ni Mayor Sherwin Gatchalian sa Valenzuela city ngadto sa mga politiko sa dili paggamit sa balaang mga adlaw sa ilang politikanhong interes.

Gani, ang mayor miawhag sa kabataan sa dili pag-usab sa "pabasa" sa pasyon ni Jesucristo. Gibadlong niya ang mga bata sa dili pag-rap sa pagbasa sa pasyon tungod kay aduna kini naandan nga pamaagi sa pagbasa.

Tinuod nga adunay mga kausaban, apan dili tanang butang mahimong usbon, sama sa pagbasa sa pasyon ug katapusang pito ka pulong ni Kristo Jesus.