Ang isyu

Misaludo si Arsobispo Jose Palma sa gihimo sa St. Theresa’s College sa wala pagtugot sa lima niini ka mga tinun-an nga makasalmot sa ilang graduation ceremony kaniadtong miaging Biyernes tungod kay nakalapas sa ilang patakaran kini bisan pa man sa kamandoan sa hukmanan nga papasohon sa ilang graduation ang nagreklamong mga tinun-an. Ang arsobispo nagkanayon nga nakasabot siya sa patakaran sa tunghaan bahin sa ilang dress code ug pagtudlo sa maayong pamatasan ngadto sa ilang mga tinun-an. Midugang pa ang Arsobispo sa pag-ingon nga ang kontribusyon sa mga katolikong tunghaan mao ang paghatag og solidong academic formation ug pagtudlo og kristohanong balor ngadto sa mga tinun-an. 

Gawas kang Arsobispo Jose Palma gipanalipdan usab ang St. Theresa’s College sa kasamtangan niining mga tinun-an ug graduates tungod kay mao na gyod lagi kuno kini ang patakaran sa ilang tunghaan.

Sa dili pa malubog pagmaayo ang tubig nga gisawom sa mga mipabor sa tunghaan ato una kining patin-awon sa atong mga pagpasabot aron walay mangaumod, mangadusmo ug mangamodmod.

Sa akong pakighinabi sa duha ka ginikanan sa mga tinun-an dihang ako silang nahimamat (sa wala pa molugwa kining maong isyu sa publiko) kay nagpakitabang, wala gayod sila magreklamo sa patakaran sa tunghaan, seguro tungod kay nasayod na sila niining daan. Ang ila ra gyod nga gireklamo mao ang wala paghatag og kahigayonan sa ilang mga anak ug kanilang mga ginikanan nga makapasabot sa gihimo sa mga bata. Gani mao usab kini ang ilang gipaabot sa hukmanan diin sila gipaboran.

Ang isyu dinhi dili ang patakaran kun dili ang wala paghatag og higayon sa mga tinun-an ug sa ilang mga ginikanan nga makapasabot sa ilang habig mahitungod sa pasangil. Busa usa ka dakong inhustisya ang gihimo sa tunghaan ngadto sa lima niini ka mga tinun-an nga gihikawan sa ilang katungod pagsalmot sa graduation ceremony nga wala man lang paminawa.

Kun wala pa lamang manglaktod ang mga madre ug opisyales sa St. Theresa’s College seguro kauban ako ni Arsobispo Jose Palma sa pagsaludo kanila.

Sa akong tulumanon SAKSI EVENING EDITION sa DySS Super Radyo Cebu unang mibuto kining maong balita kay diri kanako unang miduol ang duha ka ginikanan sa mga tinun-an kay nagpakitabang ug sa atong mga pagtuki wala gayod nato kondinaha ang patakaran sa tunghaan tungod kay ila usab kini. Ang atong gikondinar ang wala pagsunod sa tunghaan sa gitawag og due process of law ug ilabi na gayod sa wala pagsunod sa tunghaan sa kamandoan sa hukmanan.