EDITORYAL - Si Pacman usa na ka-evanghelista sa Biblia

Kun sayon alang kang Manny Pacquiao ang pagpildi sa iyang kontra pinaagi sa iyang kumo, ang paggamit  niya sa Biblia aron itudlo sa tawo ang kaluwasan layo ra kaayo sa kamatuoran.

Kay ang Biblia gimugna dili lang sa pagsaway sa tawo kundi para ang tawo maluwas sa pagbalik ni Kristo nganhi sa kalibotan.

Sumala sa Biblia ang pagbalik ni Kristo usa ka makalilisang nga adlaw nga wala’y makabantay niini busa pipila lang ang maluwas nga makasugat Kaniya sa maong adlaw, ug ang maluwas mao kadtong mga natudloan sa mga sinugo sa Dios pinaagi sa tagna nga napatik sa Biblia.

Ang mga sinugo sa Dios nga motudlo sa Iyang mga pulong nga nahisulat sa Biblia, aron dad-on sa kaluwasan ang tawo mahimo pinaagi sa Iyang direktamente nga mando ug pinaagi sa tagna.

Si Moises nga Iyang gisugo aron luwason gikan sa pagkaulipon sa Ehipto ang Iyang mga anak, wa kabalibad dihang nabati niini ang tingog sa Dios nga   nagsugo kaniya nga pangunahan sa pagbakwit ang kaliboan ka mga Ehiptoanon kaniadto gikan sa Ehipto.

Si Kristo nahimong sinugo sa pagtudlo sa mga pulong sa Dios pinaagi sa tagna, ug una Siya matawo sa kalibotan may gisugo usab ang Dios sa pagsangyaw sa balita nga matawo na si Kristo, ang manluluwas sa kalibotan, ug ang maong sinugo mao si Juan Bautista.

Kun may gisugo man ang Dios sa kalibotan sa pag-ebanghilyo sa balita nga matawo si Kristo, may gisugo usab ang Dios sa pag-ebanghilyo nga mobalik si Kristo niining katapusang mga adlaw.

Ang maong sinugo may mga katabang sa pagpatin-aw sa mga pulong sa Dios nga nahisulat sa Biblia nga nagtudlo sa tawo og paagi unsay iyang buhaton aron maluwas inigbalik ni Kristo, ug kining sinugoa maoy angay paminawon sa tawo.

Si Manny ug ang kaliboan pa nga nagpatawag sa ilang kaugalingon nga ebanghelista sa Biblia alang sa ilang relihiyon, sinugo ba sa Dios nga may tagna nga mabasa sa Biblia?

Kun wa, aw wala sila’y katungod nga motudlo bahin sa kaluwasan sa pagbalik ni Kristo kay wa usab sila’y ikatudlo bahin niini. Di ba?