Kadaugan ni Mike

Si Mike Dilla gustong mag-doktor. Aron pagpasidungog sa iyang 80 anyos nga amahan nga nikuha apan wa katiwas sa kursong medisina. Apan may dakong babag sa iyang ambisyon. Wa sila’y kuwarta alang sa kolehiyo.

Labihang lisora sa kahimtang sa pamilya ni Mike nga ang ilang barungbarong wa magtugkad sa yuta. Naglutaw sa dagat sa Ermita, luyo sa merkado sa Carbon sa Dakbayan sa Sugbo. Kinahanglan siyang mosubay sa gamay’ng lipak nga taytayan aron makasud-gawas sa ilang pinuy-anan.

Wa silay linya sa kuryente. Way suga. Gawas sa kakuwang sa kuwarta, imposible alang ni Mike ang pagbasa ug pagtuon sa iyang mga libro sud sa ngiob nilang bay.

* * *

Wa hinuon magpapiog si Mike sa kalisod. Determinadong nagtuon ubos sa sigang suga sa mga poste sa ilang duol. Kun mag-uwan, modangop siya sa silingan nilang tindahan nga hayag ang tugkaran. Kasagaran maapsan siya sa pagpanera sa tindahan. Maayo na lang nga ang tag-iya sa tindahan naluoy ug nidapit ni Mike pagsaka ug pagpadayon sa iyang pagtuon sud sa bay.

Tungod sa kaluya na sa ilang amahan, si Mike ug pito niya ka igsuon nitabang sa panginabuhi sa ilang inahan sa pagpanlimpiyo og tawgi ug pagbaligya ini sa Carbon. Usa ka higayon nga nagkinahanglan sila’g kuwarta, niapil si Mike sa “Miss Gay” beauty pageant sa Ermita. Ug nidaog ug nakadawat og cash prize.

* * *

Si Mike tinun-an sa Abellana National School (ANS). Diin nadapit ang pagtagad sa iyang mga magtutudlo sa iyang kakugi sa pagtuon. Gidasig nila siya ug gitabangan sa pagsugakod sa mga gastohan ug paglikay sa dangog nga mga tentasyon sa iyang kalinghod.

Sa unang duha ka tuig ni Mike sa ANS, sakop siya sa Section 3. Sa ikatulong tuig, sakop siya sa Section 2. Sa iyang ikaupat ug kataposang tuig, nahimuntog siya sa Section 1. Way usang nakugang, gawas lang tingali ni Mike ug sa iyang mga ginikanan, nga siya’y valedictorian sa General Curriculum (Day) sa ANS.

* * *

Si Mike usa sa upat ka valedictorians sa ANS. Siya ray laki. Pulos babaye ang valedictorians sa General Curriculum (Evening), Technical Vocational Education ug Special Program in Sports. Way kasayuran ang upat nga gipasusi ni Ernesto Jacel, prinsipal sa ANS, kinsa nila ang labing haom nga makadawat sa P100,000 nga scholarship fund nga gitanyag sa Doña Modesta Singson Gaisano Foundation.

Nimando si Jacel sa mga magtutudlo pagsusi kinsa nila ang labing kabos ug labing nagkinahanglan sa hinabang. Gisungko nila ang mga dapit nga gigikanan sa upat. Dihang natultolan ang barungbarong ni Mike, napapas ang tanang pagduda kinsay angay’ng tabangan. Wa kapugong ang mga magtutudlo sa paghilak. Ug nisamot pang ilang pagdayeg sa talagsaong katakos sa ilang tinun-an pagbuntog sa katimawa.

* * *

Email: [email protected]