Nagbaha ang aspalto

Usa sa mga senyales nga “election mood” na ang Pilipinas mao ang ka-busy sa mga karsada dili tungod kay nanaghan ang mga sakyanan nga mangagi kun dili tungod kini sa kadaghan sa mga kontraktor nga mosiaw sa pagpangayo sa mga karsada.

Dili tanang dapit ang maigo niining maong senyales. Apan kun nakapuyo kamo sa mga lugar nga naigo niining maong tinuntoha, sapoton kamo ug magpangagot sa klarong katuyoan nganong ang mga karsada gipang-ayo. Kanang Cebu South Coastal Road, sukad natukod kana wala kaayo matandog sa mga kontraktor. Apan nagpabiling nindot ang karsada sa Cebu South Coastal Road nga naglagbas sa dakbayan sa Talisay, ikomparar sa naglagbas sa South Road Properties (SRP) nga makadaghan na gitandog.

Unsay kalahian? Ang karsada sa SRP aspaltado ikomparar sa Talisay nga sementado. Kun aspaltado ang usa ka karsada, dali ra kaayo kini magupokgupok ug mapulpog tungod sa kadaghan sa mga sakyanan nga mangagi, ilabi na ang mga dagkong sakyanan sama sa mga dump truck, cargo truck, trailer truck, ug uban pang mga bug-at kaayo nga mga sakyanan.

Bisan makadaghan na ayoha ang aspaltado nga karsada sa SRP, ang sementado nga karsada sa Talisay pabilin hamis ug walay lubak-lubak. Sa ato pa, mas nindot kining sementado kay dugay maguba, ikomparar sa aspaltado. Apan ngano man nga karon gipangtabonan naman og aspalto ang nindot pa kaayong mga sementadong karsada sa Cebu South Coastal Road sa Talisay?

Nakadungog ko nga bisan sa north highway sa mga lungsod sa norte, ilabi na sa Tabogon nga ang mga nindot pa kaayong karsada gipangguba gyud og tuyo bisan minus pa kaayo og tatsa ug wala pa kaayoy lubaklubak.

Sumala pa sa atong tinubdan nga mga kawani sa Provincial Capitol nga adunay mga karsada sa norte nga gituyo og bangagbangag.

Ngano man ni?

Akong amigo dali kaayong nakatubag: election time naman gud.

Gisubayan ko niya nga daghan diay’ng mga politiko karon nga nagdalidali sa paggasto sa pundo nga anaa sa ilang kontrol iyawat magamit sa eleksiyon ang “SOP.” 

Mao kini ang nakaparat sa Pilipinas. Hilabihan kadaghan sa mga lugar nga wala pay karsada. Adunay ubang lugar nga adunay karsada apan dili sementado o aspaltado. Adunay ubang karsada nga grabe na kadaghan ang lubaklubak. Apan ang gi-una-una og pang-ayo kadtong dili ayuhonon, sama sa nahitabo sa South Coastal Road nga nindot pa kaayo ang semento, apan gitabunan na og aspalto.

Kun ganahan mo mokonpirmar, tan-awa ninyo ang aspalto mura’g ampaw sa Carcar ang grano. Nagtuo ko nga dili kini maabtan og eleksiyon sa Mayo sunod tuig, mangaguba na kining mga karsadaha tungod sa pagdalidali sa pagpabaha sa aspalto. Gani, kagahapon sa sobra nakong salig nga bag-o ang aspalto, nahulog ko sa milubyok nga bahin sa aspaltadong karsada. Tiaw mo na, bag-o pa gani milubyok na. Tungod kini sa kadaghan sa mga bug-at ug dagkong mga trak nga mangagi. Ug kining mga lubyoka, libaong na inig lapas sa tulo ngadto sa upat ka semana.

Sa ato pa, kun dili pa moabot ang eleksiyon sa sunod tuig, guba na ang maong karsada nga gipangtrabaho’g dalidali karon hinungdan nga nanga-ampaw ang timplada sa aspalto, mag-antos na usab kita og taastaas nga panahon una kini maayo.

Tingale, magbaha na usab ang aspalto sa 2016 nga eleksiyon.