Mubo nga kahilom sa Semana Santa

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Magsaulog ang Kristohanong katilingban sa Semana Santa. Ang gibalaan nga mga adlaw sa paghandom sa makasaysayanong kaagi ni Ginoong Hesukristo nga gipaantos sa pagpas-an sa Krus nga maoy gilansangan kaniya sa mga Hudiyo dihang gisilotan na kini sa kamatayon alang sa pagtubos sa mga sala sa katawhan.

Nunot niining maong mga adlaw sa maong kasaulogan maoy atong masinati ang kamingaw sanglit ang katilingbang Katoliko adto man mag-ambahan sa mga simbahan sa pagtambong sa mga kalihokan nga gihan-ay sa atong kaparian.

Sanglit niining maong mga adlaw sa kasaulogan sa Semana Santa atong palandongon ang han-ay sa mga pag-antus ni Jesus nga miinanay sa pagtapos sa tawhanon niyang kinabuhi.

Sa atong pagpatidlom ning maong mga adlaw sa atong paghinuktok maoy atong maugkat ang lintunganay nga katuyoan sa Dios paghaw-as kanato gikan sa atong paglunang sa mga sala.

Daghan ang nag-ingon nga ang mga adlaw sa kasaulogan sa Semana Santa lahi sa ubang mga adlaw sa mga kasaulogan nga gihimo sa mga Kristohanong katilingban sanglit sa bisan asang dapit sa kapupud-an mao man gayod ang mopatigbabaw ang kahilom.

Ang katilingbang Katoliko kun dili man magyampungad sa mga simbahan, sagad adto kini mopaingon sa mga awaaw nga lugar aron sa pagpahimulos sa daklit nga kahilom sa kalibotan.

Sukwahi kaayo ang maong mga adlaw kun atong itandi sa atong pagsaulog sa Pasko nga maoy pagkatawo ni Ginoong Hesukristo nga ang katawhan naghudyaka ug nagmaya nga magsugwak sa pagsulod ug gawas sa dagkong department store, mga mall ug magkinagang sa mga pinalit.

Ang uban mipadayag usab sa pag-ingon nga bisan mga politiko atong makita nga magyampungad sa mga simbahan sa pagpakita sa ilang kaugalingon nga ang adlaw sa kamatayon ni Ginoong Hesukristo hingpit usab nilang gibalaan.

Kini giisip lamang hinuon nga maoy hulagway sa mubo nga kahilom sanglit human sa mga adlaw sa atong pagsaulog sa Semana Santa manumbalik man gihapon ang naandan nga kinaiya.