Labella vs. Young

Misugod na gayud pagbukal ang takuri sa pulitika sa dakbayan sa Sugbo niining pag-anunsiyo ni Konsehal Edgardo Labella pagdagan pagkabise mayor ilalum sa kampo ni Mayor Michael Rama.

Kini nga kalamboan mipasamot sa ka alagre sa kumbati sa umaabot nga piniliay sa dakbayan. Gani, karon pa lamang, kini na ang gisumsoman sa mga molupyo sa dakbayan.

Ikasangka ni Labella ang kasamtangang bise mayor nga si Joy Augustus Young, kinsa klarong magpapili pag-usab ilalum sa pako sa Bando Osmeña Pundok Kauswagan ni Kongresista Tomas Osmeña.

Hinuon, kini nga kalamboan sinyales usab sa pagkabungkag sa solidong BOPK nga solidong midominar sa Konseho. Ang pagbiya ni Labella sa BOPK magpasabot usab nga aduna nay klarong supporter si Rama sa konseho karon gawas ni Konsehal Edu Rama.

Hinuon, dili usab mabintahaan si Labella. Nag-una sa iyang impresibong credential ang iyang pagka-abogado. Gani nahimo pa kining director sa Office of the Ombudsman-Visayas.

Sa hawanan sa konseho, dako na usab ang kasinatian ni Labella sa pagpanday og mga ordinansa. Nahimo na siyang haligi sa konseho kun sa aspeto’ng legal ang hisgotan. Isip usa sa mga importante’ng miyembro niini, hataas na nga panahon ang iyang pagserbisyo sa Konseho.

 Daghan ang nakamatikod nga maglisod gayud si Young niining iyang pagpakigkumbati kang Labella sa sunod nga eleksiyon. Panington gayud siya’g bugbog tungod kay daghan usab og suporter ang konsehal.

Hinuon, dakong misyon usab ni Labella ang pagpildi sa bise mayor. Nakapondar na usab si Young sa iyang posisyon karon. Ug kini maoy nag-una niyang advantage batok kang Labella.

Apan dili usab ikalimod ni Young nga wala siya karon sa iyang puwesto kun wala pa siya makasandig sa BOPK. Kun dili pa tungod kang Kongresista Osmeña, dili mahimong bise mayor si Young karon.

Klarong misikat si Young sa publiko sa dihang nagsilbe kining education consultant sa nilabay’ng administrasyon ni Osmeña. Suod siya sa mga tulonghaan hinungdan nga ilado siya sa mga estudyante ug mga ginikanan.     

Apan layo pa ang piniliay. Daghan pa ang mahitabo. Puwede pang mausab ilang mga huna-huna. Apan sa akong tan-aw, silang duha gayud ang magharong alang sa ikaduha nga labing taas nga posisyon sa City Hall.

Mora’g determinado si Young nga mopadayon pagkupot sa iyang puwesto. Wala pa siguro moinit ang iyang sampot sa lingkuranan sa iyang opisina tungod kay primero pa lamang niya kini nga termino.     

Kun kinsay modaug, wala pay usa ang nahibalo. Apan kini nga kadaugan magdepende unya sa diskarte sa isig ka habig panahon sa kampanya hangtud na sa adlaw sa piniliay

Hinuon kun kinsa unya ang adunay dakong tsansa nga modaug nagdepende usab sa dagan sa kampanya sa mga magka-kontra sa pagkamayor. Ug ang kumbati unya ni Mayor Rama batok ni Kongresista Osmeña maoy labing giatngan sa katawhan ning dakbayan.

* * *

Email: [email protected]