SA gihimong Bible Exposition nga gitawag Grand Evangelical Mission sa Iglesia ni Cristo didto sa Fuente Osmeña rotunda masihag ang matawag nga skeletal structure o gidaghanon niini gikan sa katibuk-an ang pagpabilin niyang minoridad nga grupo dinhi sa nasud.
Ang maong obserbasyon maoy misantop sa hunahuna sa pipila ka mga tigpaniid human nila masuta nga ang gikabalak-an sa kadaghanan nga ang naandang “Pamahayag sa pagtulun-an sa Dios” sa INC manghilabot sa impeachment issue karon wa diay kamatuoran. Hinuon di kalikayan nga kun isyu sa padaghanay ang hisgotan, wa ra sa kumingking sa gidaghanon sa atong namat-an og kahayag nga relihiyon ang mga miyembro sa INC karong panahona.
Kay angay masayran sa tanan nga ang nahimong INC karon gikan ra baya usab sa mayoridad nga relihiyon sa kalibotan karon nga gisabwag ni Magellan dinhi sa Pilipinas niadtong tuig l521.
Unya miihap og pila na ka siglo una motumaw ang INC sa nasud niadtong 1914, busa di katingad-an nga gikan sa usa ka tawo nga nagsangyaw bahin sa INC sa maong tuig, nagpabilin lang gihapon kining minoridad karon itandi sa higanteng relihiyon nga gigikanan sa mga miyembro niini.
Sama sa panahon ni Noe niadtong gipagama siya sa Dios og arka, sa kadaghan na sa tawo nga eksistido niadtong panahona, walo ra sila ka tawo ang nakasakay sa maong arka ug naluwas sa lunop niadtong higayona.
Sa panahon ni Moises, daghan na kaayo ang tawo sa kalibotan niadtong panahona apan ang pipila ra ka pudyot nga mga taga nasud sa Israel nga gipangulohan ni Moises maoy gitawag nga mga anak sa Dios niadtong higayona nga may saad sa kaluwasan sa pagbalik ni Kristo. Sa panahon ni Kristo niadtong buhi pa siya hangtod nga misaka siya sa langit ug nangamatay ang Iyang mga apostoles, dyutay ra kaayo ang nahibilin sa mga miyembro sa iyang relihiyon nga nagpakamatay paglaban sa ilang katungod , apan may saad sa kaluwasan sa Iyang pagbalik.
Unsa may katarungan nga ang INC niining panahona modaghan? Di ba?