Ang kadaugan sa mga Ouano

Human molabay ang walo ka tuig, nahukman na gyod ang onse ka mga akusado sa paghimo og ginadiling drugas sa dakbayan sa Mandaue. Apan samtang magtingkagol sa tibook nilang kinabuhi ang onse ka mga konbiktado sulod sa prisohan kay napamatud-an nga sad-an, adunay nakaginhawa ug nagmadaugon sa iyang pagpakigbisog sa hilom human mapukan sa iyang mga kaatbang sa politika ug kini walay lain kun dili si kanhi mayor ug karon bokal nga si Teddy Ouano.

Dili ikalimod nga ang kaso sa mga gipangkonbikto karon mao ang gihimong puhonan sa mga kaatbang ni Teddy Ouano kaniadto sa politika sa dakbayan sa Manduae ug gani mao gayod kini ang hinungdan kun wala ko masayop sa pagkapukan niya sa politika human mapublikar ang labing dakong laboratoryo sa shabu sa Asia nga nahimutang sa dakbayan sa Mandaue. Si kanhi mayor ug karon bokal Teddy Ouano gidudahan nga miprotihir sa operasyon sa shabu laboratory tungod kay wala gyod siya masayod niini bisan og pila lang kini ka lakang gikan sa iyang buhatan. Ang maong mga pagduda mao ang gisakyan sa iyang mga kaatbang sa politika.

Apan human sa pipila ka katuigan nga nanglabay hinay-hinay ra usab nga nakasabot ang mga Mandauehanon nga ang mga Ouano biktima lang sa politika tungod kay gipili naman usab nila si Lolipop Ouano Dizon pagkakonsehal ug si Teddy Ouano mismo sa pagka bokal sa ika unom nga distrito sa Sugbo. Ug karon nga napakanaug na sa hukmanan ang iyang hukom hingpit na gyod nga nakaginhawa ug nagmadaugon si Teddy Ouano sa hilom niyang pakigbisog. Nalimpyohan na gyod sa hingpit ang iyang pangalan kini tungod kay nahuman na lang ang kaso sa onse ka mga konbiktado apan wala gayoy maski usa na lang ka kaso ang napasaka batok kang Teddy Ouano. Bisan ang saksi sa gobyerno wala maski anino na lamang sa iyang testimonya maghisgot sa kalambigitan ni Teddy Ouano sa ilang operasyon sa shabu laboratory diha sa dakbayan sa Manduae. Busa sa dili direkta nga pagkasulti, iyang gilimpyohan ang pangalan sa mga Ouano.

Sa laing bahin, ang silot nga gipahamtang sa hukmanan ngadto sa onse ka mga konbiktado makapahigmata unta sa atong mga magbabalaud nga ang silot sa tibook kinabuhi gaan ra kun ikomparar sa kadaut nga gikahatag sa drugas ngadto sa kinabuhi sa mga nahimo niyang biktima.