EDITORYAL - Pag-panic sa tsunami alert kinsay basulon

Ang tawo nga malisang sa usa ka butang nga wa niya masuta ang kamatuoran unya may mahitabo kaniya nga dautan, di siya angay mobasol og laing tawo.

Kay ang dali gud kaayong mahadlok kun adunay pagpanghadlok mao ra man ang mga bata nga way buot.

Kaniadto ang mga batang gagmay kun maghilak ingnon dayon sa mga dagko nga ayaw og hilak kay masuko ang polis, mohilum intawon dayon ang bata.

Ikaduhang kahadlokan sa bata mao ang ungo, kun mohilak gani ingnon dayon sa mga dagko nga ayaw og hilak kay masuko ang ungo, mohilum usab intawon dayon ang bata.

Tungod sa maong kinaiya, nadala intawon kini hangtod nga siya nahamtong o kaha natiguwang.

Di naman  mahadlok og polis o kaha ungo, pagsinggit sa mga maldito nga adunay tsunami, tua mibahag ang ikog sa kahadlok ug wa na masayud kun asa siya paingon.

Mao kini kasagarang hinungdan nga daghan kaayong mamatay sa gitawag nga stampede.

Diha sa stampede, bisan may mangutot lang taliwa sa magdasok nga katawhan unya may mosinggit nga “bomba”, moalibwag dayon og dagan ang tanan bisan wa masayud kun tinuod bang bomba ang anaa sa iyang palibot.

Kumo kay wa masayud kun asa siya dagan, aw magkaboang hangtud nga kun matumba, mamatay kay tumban man sa mga tiil.

Kun di matumba makatunob sa tawong natumba busa   inderekta siyang nakatampo sa krimen nga pagpatay sa inosenteng tawo nga iyang natumban.

Busa ang di pagsuta sa tinubdan sa gikahadlokang butang unya magpatuyang og dagan nga way klarong padulngan, makahimo sa usa ka tawong kriminal tungod kay inigdagan niya daghang maangin ug matakdan busa magkaboang nga kundi mamatay kay matumban, makapatay kay makatunob og tawong natumba. Di ba?