Way tawo nga di gusto nga makabarato aron makadaginot sa iyang gasto. Apan tingali tungod sa kauwaw, kaikog, kataha, garbo o wa lang gyu’y diskarte unsaon pagdaginot, hangtud nga nanubra na ang gasto ug wa nay ikagasto.
Ania ang pipila ka diskarte nga gisugyot aron ta makadaginot: Mahigalaon sa tagtungod, sinaligan o piniyalan sa paninda o tanang klase sa negosyo, ginagmay o dinagko, aron unya makadawat og pabor kun may paliton ka na. Planoha ang pagpalit di kay kinalit-kalit, bunga lang sa gusto di sa panginahanglan. Suroya ang mga tindahan manghinan-aw o mag-window shopping ayaw pamalit kun di maniid sa mga presyo, ilista kun may posibilidad kang kinahanglanon, kay di managsama ang ilang presyo.
Grand promo sales paabota kun duna kay plano nga paliton. Apan ilista ang presyo sa wa pa ang promo aron pagseguro nga mibarato kini. Distributor nga tindahan, adto pamalit kay menus ug makapalit bisa’g menudo o retail. Wet market o Carbon market daghan kang mapilian ug mapalit nga barato pa. Credit cards ayaw gamita, makaadik sa utang ug makadaginot sa interest ug labad sa obligasyon. Makadaginot sa plite nga molakaw kun ang gilay-on duol lang. Kun mosakay, andama ang sinselyo ug kun estudyante o senyor citizen kuhaig 20% ang plite, kay prebilihiyo kana. “Ukay-ukayan o used items nga tindahan, imported na mas makabarato pa. Surplus nga sakyanan adto pamalit sa buhatan makakita ka’g maayo gyud ug mas makahangyo pa kay sa display center nga gipatungan na kini.
Sa sunod maoy hisgutan nato ang diskarte sa dugang nga kitaon.