EDITORYAL - Porma sa SALN gibag-o sa CSC

Sugod karong tuiga bag-o na ang porma sa SALN kay nakabantay kuno ang Civil Service Commission (CSC) nga usa sa   gikulitog pag-ayo sa impeachment case in CJ Corona mao ang iyang SALN .

Ang bag-o kunong SALN nga pa-fill-apan sa tanang kawani ug opisyal sa goberno nga ipasumiter karong Abril, pasuwatan na sa nabayrang buhis sa matag kawani sa kagamhanan.

Gihimo kuno kini sa CSC aron maglisud na ang mga dagkong opisyal sa goberno sa pagpanikas sama sa daghang nadiskobrehan karon sa SALN ni CJ Corona nga nagkamuritsing.

Maayo man gani kay kaantigo gyud   mo-depensa ang iyang ang abogado pagtabon-tabon sa kamatuoran apan ang publiko nga naniid ilabi na ang mga ultimong kawani sa goberno nga gagmay kaayo og butang apan nagtinarong gyud sa pagbutyag niini diha sa ilang SALN, di mailad.

Sa pagkatinuod, kun may mga kawani man sa goberno nga di magtinarong sa pagbutyag sa ilang kabtangan diha sa SALN, way lain kundi ang mga dagkong opisyal kinsa dagko kaayo og katigayonan .

Tungod kay di magtinarong sa pagbutyag sa uban nilang kinitaan gawas sa ilang suhol nga gidawat sa goberno, aw natural ilimod usab nila ang mga kabtangan nilang gigastohan sa kuwarta nga wa nila ibutyag sa ilang ITR aron di sila mabuko.

Kay ang di pagtug-an sa ilang kinitaan diha sa ilang ITR nagpasabot nga wa sila magtinarong pagbayad og buhis sa goberno nga sa laktod usa ka inderektang pagpangawat. Aron di sila hisakpan nga nangawat , pinaagi sa di pagbayad og hustong buhis, natural di usab nila itug-an sa ilang SALN ang mga kabtangan nga ilang gigastohan sa kuwarta nga wa nila buhisi, sa ilang ITR aron di sila hisakpan.

Unya sama niining kang Corona nga gikulitog karon pag-ayo sa senado, makaikyas diay siya niini? Di ba?