Lain na sad, Sir P-Noy?

Lain na sad ang gi-link ngadtong Presidente P-Noy. Usa ka maanyag ug batan-ong Koreana nga showbiz anchor kuno sa GMA-7. Nabutyag ang ngalan niini sa usa ka news item nga si Grace Lee.

* * *

Matud pa sa balita, si Grace miangkon kon miadmiter nga nagka-date sila ni P-Noy. Dali ra kaayo nikatag ang balita. Tungod kini sa kakusog modagan sa news nga sama niini pinaagi sa tsika network.

* * *

Si P-Noy wala mokonpirmar o manghimakak niini. Dihang gipangutana siya sa usa ka masukitsukiton nga reporter, nipahiyom ra kuno ang ulitawo.

* * *

Mga lungsuranon nga atong gipangayuan og komentaryo bahin niini, wala mohatag og importansiya sa balita. “Ngano man diay kun makig-date si P-Noy?” matud sa usa ka miyembro sa women’s league. “Tungod kay Presidente tangtangan nalang siya og katungod nga malipay?”

* * *

“Pasagdi si P-Noy sa iyang love life oi,” matud pa sa usa ka President & CEO sa usa ka dakong korporasyon dinhi sa ato. “Ang atong tutokan pag-ayo mao ang nagpadayong impeachment trial.”

* * *

Laing komentaryo: “Dili maunsa ang nasud kun mapakyas si P-Noy sa iyang love adventures.”

* * *

Angay ta hisgutan tingali ang usa ka linya sa news item diin giingon nga si Grace Lee bisan Koreana larenong mosulti og Cebuano.

* * *

TRIVIA -- Kumosta sa atong mga higala sa mga barberya, beauty parlor, ug bus terminal. Salamat sa inyong nagpadayong suporta sa Banat News. (With JVJ)