Mga abusadong kawani sa gobiyerno

Niadtong Enero 21, 2012 adlaw’ng Sabado usa ka Franklin Martillan, job order sa LGU Barili, kurso kaayong nidala sa motor nga gipanag-iya sa maong munisipyo nga adunay pula nga plaka SF 4711, base sa akong nakita nga blotter sa kuwerpo sa kapolisan sa lungsod sa Alcantara diin nakabangga og duha (2) ka tawo.

Gitanggong karon ang maong driver sa nahisgutang kuwerpo sa kapolisan sa lungsod sa Alcantara, ang ikatulo nga nabiktima mao ang angkas o backrider sa driver nga taga Barili, nahitabo ang maong vehicular accident sa alas 5:15 sa kahaponon.

Ang punto nato mga higala nga gusto nakong isawo sa atong mga kaigsuonan nga mahimo ba diay madala ang sakyanan nga gipanag-iya sa gobiyerno bisan dili oras sa trabaho? Ang nakasamot pa mga higala kay ang maong driver wala’y lisensiya kun atong tinambanon og paminsar mura man adunay pag-pangabuso nga nahitabo ug dunay kahuyang ang hingtungdang opisina diin asa naka MR o Memorandum Receipt ang maong sakyanan kay nganong yano rang nadala sa maong tawo?

Unsa pa kaha kun ang mga biktima sa maong insidente nangamatay simbako? Masubli na pud siguro ang atong lungsod nga himuong sumsuman gumikan sa pagpabaya sa hintungdang opisina diin ang maong sakyanan anaa sa ilang hurisdiksyon! Ang buot kong ipasabot bisan pa unsa ka abusado ang driver kun ang maong sakyanan dili magamit panahon sa wala’y trabaho wala’y madisgrasya, kay huyang man ang sistema sa maong opisina diin under ang maong sakyanan yano ra nga nadala sa tawo ang sakyanan sa gobiyerno nga niresulta sa usa ka makauulaw nga panggobiyerno, o wala pa diay ta maleksiyon sa niaging hitabo sa buwan sa Agosto diin nikalas og 11 ka tawo sa maong insidente.