Impractical nga provision sa LTFRB circular

Usahay ang uban natong kadagkuan sa gobyerno, aron ingnon nagtrabaho ug pag-justify sa mga dagkung sweldo ug allowances (ug uban pang mga perks and privileges), maghimo’g mga balaud, mga rules and regulations, mga memorandum-circulars nga lisud tumanon. 

Pananglitan, kining pag-fix sa sweldo sa mga driver sa PUBs. Kini kono, aron dili na maglumbaanay ang mga driver aron kalikayan ang mga aksidente sa kadalanan. Kalisud ining tumanon! Samtang ilang giseguro ang sweldo sa mga driver, apan waa sila mag-provide og mga paagi nga ma-seguro usab ang income sa mga operator, nga dili sila matikasan sa mga driver, conductor ug inspector.

Unya sa latest nilang circular, mibuot ang LTFRB nga ang uniform sa mga driver, gawas sa mga PUJs, “should bear the name of the driver, conductor or inspector and logo of the company/business name (if applicable). If applicable, sa ato pa, mahimo nga walay logo.

Wala ba masayod ang LTFRB nga ang mga driver come and go? Ang ubang driver, ilabina ang mga extra, tagpila lang ka adlaw. Sa ato pa, kada adlaw o kada semana, o kada bulan kang magpaburda o magpaimprinta sa ngalan sa mga bag-ong driver? Dugang kini sa gasto sa operator.

Unta, tungod kay ila mang gi-require nga mag-imprinta usab og company ID alang sa mga driver, kini na lang. Naa na ang ilang ngalan, retrato, address , ubp… nganong kinahanglan pa man nga imprintahan pa gyud ang uniform sa ilang mga ngalan? Waa ba kahunahuna niini ang LTFRB niini?

* * *

Pacquiao for President. Mao ni ang giingon ni Freddie Roach, ang chief trainer ni Manny. Matud niya, walay lain ang angayan kombatihon ni Pacquiao gawas ni Mayweather. “He can beat Mayweather and then run for President of the Philippines,”

Kuyawan sila si Binay ug Roxas niini. Gawas sa kadaghang kwarta ni Manny, sa mentality sa mga Pinoy, tan-aw nako ang sunod natong Presidente, sa gusto tag sa dili, si Manny Pacquiao.

Ug maoy atong panghinaut nga sa iyang pagka-part-time boxer, part-time Congressman, part-time entertainer ug singer, part-time social worker, ug part-time product endorser, niining panahona, dili siya mag-part-time President.

 Lagmit mahitabo ang bugno nila ni Pacquiao ug Mayweather either sa Mayo or Hunyo karong tuiga (kana kun matapus na ang iyang 90-day jail term), dili sa MGM Grand Las Vegas kay maka-accommodate lang og 17,000, kundili, sa usa ka temporaryo nga open-air arena sa The Strip nga maka-accommodate mga 45,000 ka tawo.

Daghanang kawarta ini no? Makadaug o pilde, subra kaayo ang kwarta ni Pacquiao igasto paglansar niya pagka-Presidente sa Pilipinas. Ang buhaton sa ubang mga presidential hopefuls, mao na lang ang pagpaningkamot nga mahimong running mate ni Pacquiao.

Nakasuway nata’g mga banggiitang abogado, ekonomista, military man, artista … suwayan kono nato ang usa ka boxer…. basin pag mouminto na kining atong nasud. Labing seguro dili mangawat si Pacquiao.