EDITORYAL - Ang impeachment ni CJ Corona

Daghang nabalaka nga makadaot sa gobyerno sa Pilipinas ang kaso ni CJ Renato Corona tungod lang kay gitaral siya ngadto sa impeachment court.

Kini tungod kay alang sa uban naguba ang relasyon sa Supreme Court ug Malacañang.

Hinuon alang sa mga Filipinong tarong wa magtuo nga ang maong kaso makagusbat sa katibuk-ang pangagamhanan sa nasud.

Kay ang nakataya sa maong impeachment ni Corona di ang katibuk-ang Korte Suprema kundi ang iya ra mang pagkatawo.

Kun depektuso man ang iyang pangatungdanan ug ang iyang pagkatawo, way labot ang iyang mga kaubanan sa labaw’ng hukmanan ilabi nga kadtong wa mag-apil-apil sa mga binuang sa pagkupot nila sa katungdanan.

Kay ang baroganan sa mga magbubuhis kabus ug adunahan, mao ra gyud nga kun ang mga opisyal sa kagamhanan magtinonto, wa silay gibuang kundi ang mga magbubuhis ilabi na kun may labot sa pagpangiriw sa kuwarta sa gobyerno ang ilang gikabuangan.

Busa asa mang partiha sa panggobyerno sa nasud ang magusbat niining imbistigasyon karon ni Corona.

Ang tinuod usa ka labing maayong lakang ang gihimo sa mga magbabalaod sa nasud aron ipakita kanatong mga magbubuhis nga pabor sila kanato.

Kini pinaagi sa pagpanimhot nila og mga sayop sa ubang mga opisyal sa gobyerno aron pinaagi sa kalapad sa ilang katungod sa pag-imbistigar niini, nakapahimus ta kanila di lamang sa pag-umol og mga balaod kundi pagbantay  aron tanuson kadtong hiwi nga mga binuhatan sa mga kadagkoan sa kagamhanan.

Sa samang higayon usab kun makapamatuod si Corona nga wa siyay sala, aw angay siyang malipay kay sa makausa pa mawagtang ang katahap sa kadaghanan bahin sa iyang pagkatawo ug sa iyang pagkupot sa katungdanan.

Apan di usab angayang bugal-bugalan ang mga magbabalaod sa ilang gibuhat kay alang sa mga magbubuhis, sila ang atong magbalantay aron mopaghut niadtong mga opisyal sa gobyerno nga bilyako. Di ba?