Wala sa plano
Kaniadto nahimong akong tumong sa SM ang St. Pauls, National bookstore ug BO’s Coffee. Apan karon dili sa ingon nga wala’y tumong apan mas ganahan na lang kong maglatagaw sulod sa pipila ka mga gutlo ning mabugnaw’ng SM. Dili aron hutdon ang mga palitonon didto kun dili aron tagamtamon ang kanindot sa paglatagaw. Gisud-ong ko ang bagang duot sa mga tawo ug gipamalandongan ang ilang mga panagway ug bayhon. Ang uban seryoso, ang uban nagtingsi, ang uban dunay tinong tumong samtang ang uban naglatagaw. Adunay uban managhigugmaay. Kausa samtang giusap ko nga nag-inusara ang Carbonara sa kalit niabot ang Hapon nga tigulang na kuyog ang Pinay nga batan-on pa. Loving kaayo silang duha mora’g apohan ug apo. Nag-inukobay pa sa akong atubangan mismo. Hinuon, mao naman nay uso karon: “I love you how much?”
Daghan kong nakat-onan bisan sa maong paglatagaw sulod sa SM nga mabugnaw. Kini ang miagni kanato sa kamatuoran nga sa kinabuhi ang tawo kinahanglang maglipay ug motagamtam sa nahabiling gutlo sa iyang limitadong kinabuhi. Adunay katahom usab sa mga butang nga wala sa plano. Dunay mga wala damhang panghitabo nga makahatag og pagbuka sa atong mga mata ug alimpatakan. Enjoy the Spontaneity of Life! Matud pa nila. Binitbit ang libro nga sinulat nila ni Tim and Beverly LaHaye kang kansang ulohan mao ang: The Act of Marriage: The Beauty of Sexual Love ako misakay sa OIK dayon pakli sa pahina nga naghisgot sa Art of Lovemaking. Gibasa ko kini apan sa kalit ako napugwat sa ringtone sa akong cellphone nga courtesy sa Missing Felimon nga nagkanayon.
Kung ako ikaw molakaw maglatagaw. Way mahimo kung dili nimo ipahungaw. Pangita’g lingaw. Di ka angay’ng mauwaw. Kinsa bang balaod ang imong gisunod? Tawga ang kalangitan, pasalamat sa uwan, hangyoang mga santos nga di na matapos ang unos!
Ang text message nagkanayon: “Wer na U?” ako ni-reply: Pauli na Me. Ug message sending failed ra diay.