Friday the 13th

Nagkalainlain ang komentaryo kalabut sa bag-ong tourism slogan sa Department of Tourism (DOT) nga "It's more fun in the Philippines." Adunay midayeg apan daghan usab ang nanaway. Unsa may diperensiya kun gigamit na kini sa Switzerland sa ilang tourism promotion sa dugay na kaayong katuigan?

Dili ako makasabut kun nganong ang mga Filipino grabe kaayong manaway sa atong kaugalingong nasud ug sa atong kaigsoonan. Kinahanglang usbon nato kining dili maayong batasan hinonu-a magkat-on kita sa pagmahal sa atong nasud. Pinaagi niini nagtoo ako nga molambo pag-ayo ang Filipinas.

Nganong dili man hinoon nato suportahan ang DOT aron magmalampuson kita sa atong tourism campaign? Alang kanako ang labing mahinungdanon mao ang paghatag og nawong sa maong slogan aron pagdani sa mga turista.

* * *

Adlaw karong Biyernes petsa 13. Ambot ug unsa gayud ang tinood nga gibasihan niini apan daghang mga tawo nga nagtoo nga dimalas kining adlawa. Apan Friday the 13th o bisan unsang adlawa mahitabo gayud ang mahitabo kanimo.

Inay ipunting nato ang atong pagtoo nga dimalas kining adlawa kinahanglang mag-ampo kita sa matag adlaw aron andam kita kun unsa man ang hukom sa Kahitas-an sa atong kinabuhi.

* * *

Ania na kanato ang Sinulog fever. Ang grand parade himoon karong Domingo. Daghan na kaayong mga domestic ug foreign tourists nga ania sa Cebu City. Dako kaayong gimbuhaton sa atong kapulisan ang pagmintinar sa kahusay ug kalinaw atol sa nagkalainlaing kalihukan.

Samtang daghan kaayong mga tawo ang motan-aw sa presentasyon sulod sa Cebu City Sports complex mas higpitan ang seguridad sa grandstand kay motambong ang mga dagkung opisyal sa nasud.

Inay libre unta ang paglihoklihok sa mga tawo sulod sa sports complex malimitihan kini tungod sa estrikto kaayong mga sakop sa security sa bise presidente labi na gayud kun motambong si Pres. Aquino. Anyway, Pit Senyor!

* * *

Tinuod ba nga adunay survey nga gihimo ang Bando Osmeña-Pundok Kauswagan karong bag-o ug ang miguwang mananaug sa pagkamayor mao si Mayor Mike Rama batok kang Kong. Tomas Osmeña?

* * *

Si Kasambagan Barangay Councilor (first) George Chang kanunay nga makit-an sa kiliran ni Mayor Rama. Nagpasabut ba kini nga maapil sa linya sa mga kandidato sa pagkakonsehal sa siyudad si Chang?

* * *

Belated birthday greeting ngadto kang Atty. Amorito "Amor" Cañete ug Lapu-Lapu City Tourism Commissioner Naty Amores.

* * *

Email: [email protected]