Himsog nga pagginhawa

Unsa man kining himsog nga pagginhawa? Nasayod na kita nga mao kini ang usa sa timailhan sa kahimsog sa panglawas. Apan ang kadaghanan, wa lang kini hatagi og maayong pagtagad kun unsaon ang pagbaton sa kahimsog sa pagginhawa.

Kun sination nato kini pag-ayo o himuong gawi ang husto nga pagginhawa, mao kini ang usa sa mahinungdanon nga makalingkawas kita sa mga talandugong balatian nga halos anaa na kini kanato — ang stress, nga di pa lang grabe apan kun pasagdan, mokomplikar kini’g daghang sakit sama sa nerbiyos, hayblad, kasingkasing, ug hubak.

Sagad natong buhaton basta bisi ta sa atong inadlaw nga gimbuhaton, mabaw ra ang atong pagginhawa, naa ra kutob sa atong dughan. Ingon sa kutasan sa dinalian nga pagginhawa pinaagi sa baba lang. Makadaot kini kay mahanggap man nato ang dautang elemento nga deretso sa baga nga magpundo kini uban sa bahaw nga hangin nga wa mapagawas pinaagi sa husto nga pagginhawa.

Mao na usahay maglisud na hinuon ta sa pagginhawa tungod kay nasudlan man og makahilo o maka-allergy sa baga nga moresulta sa hubak. Ma-impeksyon usab ang kasingkasing sa pagbomba aron padaganon ang sirkulasyon sa dugo, kay mapug-ok man kini sa kaugatan nga kulang sa hangin, nga dili kasugakod makapadagan sa dugo ngadto sa tanang mga sistima sa atong panglawas. Sa sunod, hisgutan nato ang husto nga pagginhawa.