Kun illegal ang jeepney strike, nganong di man ang court holiday?

Matag pahigayon og strike sa mga driver sa PUJ ug PUB gumikan sa kamahal sa gasolina ug krudo … unya mao lang gihapon ang plite, ideklarar dayon kini’g illegal. Unya, makadungog dayon ta nga ang mga franchise sa misalmot sa strike kanselahon.

Makatarunganon o dili ang pag-strike, apan, tungod kay makahasol kini sa public in general, isipon gyud ni nga illegal.

Kun mobiya ang mga huwes ug mga kawani sa hukmanan sa ilang mga sala … dili mo-render og service sa katawhan, pasagdan ang nagtipun-og nga mga kaso, dili ba ni illegal? In the first place, kinsa may nag-deklarar sa miaging court holiday?

Maayo man gani kay sa akong nahibaw-an, wala moapil ang atong mga hukmanan dinhi sa atong lalawigan, ug lagmit sa tibuok Central Visayas … ug sila ra didto sa Metro Manila ang mi-holiday, pagpakita sa ilang paghigugma ug pag-support ni Kongresista Gloria Arroyo ug Chief Justice Renato Corona.

Pipila ka radio caller, masuk-anong mipadayag sa ilang mga hunahuna nga kinahanglan adunay imbestigasyon nga himoon pag-determine kun kadtong mibiya sa ilang mga korte, di ba maisip nga mi-AWOL, ug ang ilang gihimo, ideklarar nga illegal.

Gitin-aw sa pipila ka legal minds, nga ang Impeachment gihimo pinasikad sa Constitution, batok sa Chief Justice, ug dili batok sa tibuok Supreme Court, ug nga wala kini himoa pag-undermine sa Labaw’ng Hukmanan. In fact, matud nila, ang Impeachment naghatag og makiangayon nga higayon kang CJ Corona pagpanghimakak sa mga alegasyon batok kaniya.

Sa samang higayon, maoy tinguha nga mahiuli ang trust and confidence sa katawhan ngadto sa Labaw’ng Hukmanan, nga sa nangaging mga adlaw, giingon nga ang maong trust and confidence nagkahilis, gumikan sa public perception nga adunay gidapigan ang Korte Suprema sa ilang mga desisyon, ubos sa pagpangulo ni CJ Corona.

Karon, ang Impeachment proceedings, unsa man ang resulta, agad sa behavior unya sa mga Senator Judges, makahatag kini’g kahusayan sa tanang mga pagduda ug mga kabalaka sa mga nanghitabo karon sa atong nasud.

Apan, definitely, bisag di ko abogado, dili huwes, dili mananag-an, sa ubos kong panglantaw, dili mahitabo ang ilang gikahadlokan nga Constitutional crisis. Ngano gud tawon! Nga kining tanan karon, subay man sa Constitutional processes. Dili kini gama sa usa ka diktador.

Si Presidente Marcos kanhi, tungod kay dili ka-diktahan ang Kongreso, iya kining gi-abolish pag-declare niya’g Martial Law. Karon, kadiktahan ba ni Noynoy ang Kongreso? Ug mosugot ba usab ang atong mga magbabalaud nga diktahan sila? Hinoon, sa panahon ni Kongresista Gloria, samtang wala sila diktahi, apan, ang House of Representatives morag gigawngan sa Office of the President. Hinumdom mo?