EDITORYAL - Ang pagpabuto og armas sa Pasko

Daghan ang ania sa siyudad karon nga wa ma-edukar bahin sa kapeligro sa pagpabuto sa ilang armas panahon sa Pasko ug Bag-ong Tuig o kaha sa bisan unsang okasyon nga wala mag-agad sa panahon.

Sa mga tawong ordinaryo nga magpabuto, kasagaran kanila mga adis-adis o kaha mga kriminal, o kaha ignorante sa kapeligro sa maigo sa bala sa ilang mga armas.

Bisan sa mga sundawo ug polis nga magpabuto sa ilang armas agig duyog sa ilang  kalipay , kundi bag-o lang napolis ug nasundawo nga taga bukid, kasagaran sa magbuhat sa ingon , palahubog ug adis-adis nga sundawo ug polis.

Sa   mga tawo nga magtubo sa armas didto sa bukid, mahimo ra kaayo didto kay bisan   mogamit pa og machinegun aron palipakan ang ilang palibot , aw ok ra kay nihit man ang tawo sa bukid .

Ang mga Katsila gud kaniadto mao may nagpatuo sa mga inosenteng Filipino nga panahon sa Pasko ug Bag-ong Tuig, kasal uban pang okasyon nga alegre, kinahanglang magpabuto aron kuno abugon ang mga dautang espiritu.

Ambot kaha, unsa na ka tinuod nga kun alingugngogan ang dautang espiritu sa pabuto busa manglayas sila, unya ikaw tawo nga mas tarong og pangutok kay sa Yawa , aw dautan pa diay ka kay sa Yawa, kay di man ka alingugngogan sa pabuto.

Mao nga di angay himuong sandiganan nga ang pagpabuto pang-abog sa Yawa.

Ang labing tinuod bisyo ra kini sa tawo nga kasagaran mugna sa iyang pagkalasbag o kaha wa sa maayong pinsada sa hunahuna sa unang panahon.

Iyang gitudlo sa iyang mga anak ug hangtod karon napanunod ang maong kinaiya sa mga Filipino.

Kun maayo ang pagpabuto sa armas sa bukid , aw ok ra didto kay dyutay ra ang tawo , apan dinhi sa siyudad ayaw kana buhata kay kasagarang matugpahan sa imong mga bala mga tawo nga may kinabuhi tungod sa kadaghan sa tawo dinhi ug maayo unta nga inigtugpa sa imong bala anha ra kanimo ug sa imong pamilya aron maimpas ang tanan. Di ba?