Kultura sa Pilipino ang kaluoy

Maluloy-on ang mga Pilipino. Kini ang kinaiya nga giisip na nga usa ka kultura. Tinuod nga adunay linuog nga mga krimen nga nahitabo sa atong nasud nga mugna sa pipila ka mga Pilipino. Apan sa kinatibuk-an gayod, ang kaluoy anaa sa kasingkasing sa mga Pilipino. Andam sa pagtabang niadtong nagkinahanglan og tabang.

Namatud-an na kini sa makadaghang higayon. Sama sa paghugop nato sa mga biktima sa kalamidad. Sa pag-unong nato niadtong pamilya nga namatyan. Sa atong pagpakabana sa mga tawo nga nag-ilaid sa kalisod ug sa adunay mga sakit nga delikado.

Labaw sa tanan, maghimo kita og lakang sa pagluwas sa tawo nga himatyon ug patyonon. Gipakita kini sa indibidwal nga Pilipino ug sa gobiyerno mismo. Karon lang bag-o, gusto na usab luwason sa atong gobiyerno ang kinabuhi sa igsuon natong Pilipino nga nasilotan og bitay sa nasud sa China tungod sa salang drug trafficking.

Usa ka dakong sala ang drug trafficking. Gani, silot man sa tibuok kinabuhi nga pagka-bilanggo ang ipahamtang sa hingtungdan dinhi sa atong nasud. Apan ang atong gobiyerno nagtinguha gihapon sa pagluwas sa kinabuhi sa usa ka Pilipino nga patyonon sa China tungod sa maong kaso.

Kun buot hunahunaon, angay siyang pasagdan kay nakabuhat siya’g dakong sala. Apan gipasabot ni Bise Presidente Jejomar Binay nga usa na ka kultura sa nasud nga Pilipinhon ang kaluoy. Si Binay ang gipadala ni P.Noy sa China aron pagsalbar sa maong Pilipino nga bitayonon.

Kini maoy pagpakita nga ang Pilipino manggiluy-on gayod. Kadaghan na buhata sa gobiyerno, dili lamang sa administrasyon ni PNoy kun dili sa miagi nang mga administrasyon, ang pagpangita’g paagi o pagsuway og luwas sa atong igsuong Pilipino nga nasilotan og kamatayon sa laing nasud.

Ug karon nga umaabot na ang Pasko, itisok sa atong hunahuna ug kasingkasing ang kinaiyang pagka-maluluy-on. Alimahan nato ang kinaiyang pagka-manggiluy-on kay tinuod nga usa na kini ka kultura natong mga Pinoy.

Dili lamang sa panahon sa Pasko, kun dili sa tanang panahon sa atong kinabuhi, kay daghan kaayo sa igsuon natong mga Pilipino karon nga nagkinahanglan sa   atong kaluoy ug sa atong pagtabang.