Diktador?

Gihulagway ni Chief Justice Reynato Corona si Presidente Benigno Aquino III nga nagsugod na pag-umol og diktadoryang pangagamhanan tungod sa tinguha niini nga kontrolahon ang tanang sanga sa gobyerno bisan na ang co-equal sa iyang buhatan.

Ang paghulagway ni Corona iyang gihimo atol sa iyang pakigpulong atubangan sa Korte Suprema human siya ma-impeach sa House of Representatives pinaagi sa 188 ka pirma sa mga kongresista.

Mamahimong exaggerated ang paghulagway ni Corona sa presidente, apan tinuod nga dunay mga timailhan sa pagkadiktador si Aquino.

Ang iyang pag-angkon nga apil siya sa nagplano sa pag-impeach ni Corona taliwa sa pagpangugat ni Kongresista Niel Tupas sa Iloilo nga way labot ang Malakanyang sa ilang gihimo, usa sa mga timailhan sa diktador nga pamunoan.

Dili siya angayang manghilabot sa kalihukan sa kongreso tungod kay wa siyay labot niini. Ubos sa Constitution lahi ang mandato sa mga kongresista ug niya isip presidente. Labaw na nga dili angayang manghilabot si Aquino sa kalihukan sa Korte Suprema.

Dunay sukaranan ang kabalaka nga tinguha gyud ni Aquino nga kontrolahon ang pagpadagan sa tanang sanga sa gobyerno. Usa ka lakang nga ang usa ka lider nga diktador lang ang makahuna-huna niini.

Kanunay’ng gisubli ni Aquino nga si Corona maoy nahimong babag sa reporma nga gustong ipatuman sa iyang pamunoan. Iyang gihimug-atan ang pagdeklarar sa Korte Suprema nga unconstitutional ang pag-umol sa Truth Commission nga gitumong aron paglutos kang kanhi presidente Gloria Macapagal Arroyo.

Gikawsahan si Corona nga nipabor ni Arroyo tungod sab sa Temporary Restraining Order nga giluwatan batok sa pagpugong nga makabiyahe ang kanhi presidente aron sa pagpatambal didto sa gawas sa nasud.

Kun seryoso si Aquino sa iyang kampanya nga “tuwid na daan” nganong dili man niya respitohan ang hukom sa korte? Kinsa may laing gihatagan og katungod sa atong balaud gawas sa Korte Suprema pag-interpret niini?

Nganong masuko man si Aquino kun dili mosunod sa iyang gustong mahitabo ang korte? Matud ni Aquino nga babag sa reporma nga iyang gusto si Corona tungod kay wala itugot ang Truth Commission pero nganong nahimo man lagi sa iyang pamunoan ang pagtaral ni Arroyo sa hukmanan sa kasong electoral sabotage nga wala ang Truth Commission?

Sa ato pa dili diay kinahanglan ang maong commission aron atong gukdon si Arroyo? Ang gikinahanglan lang mao ang pagsunod sa hustong proseso ubos sa atong balaud.

Ang tinuod nganong bokal kaayo ang dugo ni Aquino kang Corona mao nga gipatuman sa korte ang hustisya ug kaangayan sa dugay na nga gilumluman nga kaso sa mga mag-uuma batok sa Hacienda Luisita.

Nasuko si Aquino nga gimando sa Korte Suprema nga i-apud-apod ngadto sa mga mag-uuma ang yuta nga gipanag-iya sa iyang pamilya.

Sa pagkatinuod, kun duna may klarong nakahimo pagbudhi sa pagsalig sa publiko dili baya si Corona kun dili si Aquino mismo.

Mangutana ko, dili ba pagbudhi sa nasud ang iyang gihimong pagpanghatag og minilyon ka pisos nga hinabang ngadto sa mga kontra sa gobyerno sama sa mga rebelding Muslim didto sa Mindanao, New People’s Army ug sa Alex Bongcayao Brigade?

Buhis sa katawhan gihatag nga hinabang sa kontra sa gobyerno. Kinsa may nakahimo og “betrayal of public trust?”

* * *

[email protected].