“Iwas Disgrasya”mao kini awhag sa Department of Health sa tanang katawhan alang sa nagsingabot nga Pasko ug Bag-ong Tuig.
Kini tungod kay nasayod ang DOH nga ang pagpugong sa tawo gikan sa pagpabuto sa panahon sa Pasko ug Bag-ong Tuig usa ka paghikaw kanila sa ilang kagawasan.
Ikaduha, kun ilang pugngan ang tawo sa pagpabuto, sama ra nga gisurambaw nila ang mga pabrika sa pabuto kinsa nagbayad og buhis sa kagamhanan aron labing molambo ang ilang panginabuhi.
Gani mas labing maayo pa sa mga otoridad sa gobyerno nga tabangan ang pabrika sa pabuto nga makasapi og maayo aron nga dili kini maalkanse sa ilang negosyo.
Labing maayo aron makakuwarta ang gobyerno, may buhis ang matag pabuto nga pabuthon sa tawo agi og bayad sa espasyo ug palibot nga madisturbo sa kasipa ug kalanog sa buto sa usa ka pabuto.
Kini tungod kay ang baho ug aso sa pulbora nga mahanggap sa tawo sama ra usab sa abog ug aso sa sakyanan, o kaha aso sa sigarilyo nga makatampo sa pagpagabok sa baga ug uban pang bahin sa lawas sa tawo aron dali rang pukanon kun may mga dagkong hulga sa balatian nga mohadla kaniya.
Sa laktod, tungod kay gitugot sa gobyerno ang pabuto, mas labing maayo nga awhagon ang tawo nga magpabuto gyud karong Pasko ug Bag-ong Tuig apan likayan lang nga dili madisgrasya.
Kay ang kasagaran ra bang disgrasya kun magpabuto, mao ang pagka putol sa mga tudlo sa kamot, mata nga mabota, ug uban pang mga samad nga mahiagoman sa lawas sa tawo kun dili magbantay sa iyang pagpabuto.
Labaw sa tanan kun magpabuto ka seguraduha nga walay laing tawo nga mabuthan sa imong pabuto gawas kanimo, aron nga dili kaayo mobug-at ang imong kasal-anan.
Kay kun magpabuto ka aron pakuratan ang imong isig-katawo, ah dili na kana maayo ug angay ka nang dakpon ug itaral sa hukmanan aron silotan sa imong pagpanamastamas ngadto sa imong isigka-ingon. Di ba?