Mohilak ba ang buaya?

Sama sa pawikan, may tubig usab nga magpundo ilawom sa palibot sa mga mata sa buaya. Hinuon nahiduol kini sa tilaokan.

Sa mga higayon nga monganga og dako ang maong linalang sa suba ug mangusog sa pagpaak mapiga ang maong tubig ug managan subay sa ugat nga agianan niini paingon sa mga mata ug unya mangagas. Ang makakita sa pagpangagas sa maong tubig sa mga mata sa buaya moingon nga ang buaya mihilak.

Apan dili tinuod nga mohilak ang buaya kay dili man luha ang maong tubig nga mangagas. Ang luha maoy inagos sa pagbati samtang ang tubig nga mangagas sa mga mata sa buaya maoy bunga sa pagkapiga gumikan sa kadako sa nganga ug sa kakusog sa pagpaak.

Adunay moingon nga ang ihilak sa buaya mga luha sa kalagot hinungdan nga kun dunay tawo nga maghilak sa kalagot tawgon kini og buaya kay ang luha nga gihilak mga luha kuno sa buaya. (Mariano F. Mañus Sr., BN, Okt. 21, 1996)

Piloto kanunay lang mahagsa

Ni Romeo T. Limpangog

Glascow, Scotland -- Usa ka piloto ning maong dapita nga nakasinati na og 19 ka higayon nga pagkahagsa sa gipalupad niyang abyon ang gidid-an na unta sa mga awtoridad sa tugpahanan nga makapahigayon pa kini sa pagpalupad.

Apan ang maong piloto nga si Reginald Mcwier, 56 anyos nga usa ka amateur ang hugtanong misupak gumikan kay sumala pa niya nga ang pagkahagsa sa gidala niyang mga abyon naatlan gayod sa iyang dimalas ug walay labot ang iyang pagka piloto. (Romeo T. Limpangog, BN, Okt. 9, 1996)