Nganong mosungag man?

Wala gihapon maplantsa ang isyu kalabot sa proposal pagtukod og duha ka flyover sa dakbayan sa Sugbo. Ang maong isyu gituki na sa nakalabay panagtigum sa Regional Development Council sa nakalabay’ng semana didto sa dakbayan sa Tagbilaran.

Mismong si Presidente Benigno Aquino III ang mimando na sa Department of Public Works and Highways nga tun-an ang posibilidad sa road widening ug ang trapik duol sa mga lugar diin ipahigayon ang flyover projects.

Grabe gayud hinuon ang trapik diha sa Gorordo Avenue ug MJ Cuenco Avenue, ilabina sa mga peak hours. Ug nagkinahanglan kining maong problema og dinaliang sulosyon.

Apan mora’g madugay pa’ng masulbad kining maong problema. Kini tungod kay wala gayud magkasinabot ang isig ka habig. Isig pasiatab sila kun si kinsay insakto sa ilang mga proposal.

Hinuon wala koy nakitang sayop sa katukoran sa flyover ug sa pagpahigayon sa road widening. Pulos ni sila dako unya og ikatabang pagsulbad sa problema sa trapiko sa maong mga lugar.

Apan kinahanglan praktikal usab ang atong panghuna-huna sa paningkamot pagsulbad sa maong problema. Ug kun unsa ang labing praktikal, kana mao ang katukoran sa flyover.

Hinuon wala ko moingon nga dili praktikal ang road widening sa maong mga lugar. Walay dudang importante kana nga ipatuman gumikan lagi sa nagkadaghang sakyanan sa dakbayan.    

Apan aduna nay pondo ang katukoran sa flyover gikan ni north district Representative Cutie del Mar. Ug kini nga proyekto mas dali rang malihok tungod kay anaa na man ang kwarta ikumpara sa road widening nga magkapuliki unya ang mga proponent pagpangita.

Mas maayo nga kini maoy unahon kay sa niadtong road widening nga walay kasigurohan sa pondo. Hinuon wala ko moingon nga mas maayo ang flyover kay sa road widening. Ang duha pulos importante alang sa tinud-anay nga kalamboan sa atong dakbayan.

Sa ako nang gikaingon, mas labing maayo kun ang pagtukod sa flyover og road widening magkuyog. Kini aron mas hingpit nang maaksiyon ang grabeng problema sa trapiko sa dakbayan.

Apan ang nakapait man gud nganong mosungag pa man kining mga proponents sa road widening sa proyekto sa flyover. Nganong dili man usab sila maningkamot pagkuha og pondo alang sa implementasyon sa widening ug repair sa tanang mga karsada sa dakbayan?

Aduna nay pondo ang proyekto sa flyover ug ato nalang pasagdan nga matuman kini. Mas labing maayo nga pulos matuman kining flyover projects ug road widening. Kini tungod kay alang kini sa kaayohan sa tanan.

* * *

Email: [email protected]