Nobiyembre 29, 2011 didto sa Hoops Dome Lapu-Lapu City akong gikahibalag si Padre Gamorot. Siya ang nagpahibalo kanako nga namatay diay si Norman “Jabjab” Jabonero. Ako nakalitan sanglit kinsa ba gud ang wala makaila kang Jabjab? Nagkakuyog kami sa Seminario Mayor de San Carlos ug gani, nadestino man siya sa Parokya ni San Roque sa Yati, Lilo-an sa iyang pastoral immersion sa dihang si Msgr. Sin Iriarte, ako ug si Padre Irwin Pilario ang atua pa didto. Maayo siya sa musika ug gani kompositor naman siya. Siya ang nagtagik sa awit nga nag-ulohan og Kalandrakas. Bisan pa man kun wala ako makaadto sa San Nicolas, ako siyang giapil sa mga Misa dinhi sa among Parokya sa Sogod alang sa iyang kapahulayang dayon.
Luyo sa maong talento sa musika ako adunay nahinumdoman kaniya. Usa ka higayon samtang nagkita kami sa SPFY ug paingon na siya sa iyang Regency siya nagkanayon: “Mag-agad lang gyud ta sa ilang kabubut-on bay, kay ingon nga formators mas daghan pa sila’g nakita sa akong kaugalingon nga tingali wala nako hikit-i.”
Ingon ini usab gyud ang kinabuhi, mubo apan puno sa mga tanghaga. Diin angayan natong patidloman ang kaniadto, karon ug ang ugma. Ang kaniadto ingon nga kabahin sa atong personal nga kasaysayan. Ang karon nga maoy mohulma sa atong ugma. Ang ugma nga atong gilauman nga muabot pa. Sa panapos nga bahin sa awit nga Kalandrakas ni Jabjab siya nagkanayon: “Mag-usab na ta!” Ug ang pag-usab nagsukad karon gyud mismo. “Jabjab maimo unta ang pahulay nga dayon diin didto si Lazaro dili na kabus!”