Prisohon g'yud uy!

Alang nako angay’ng prisohon g’yud si kanhi Presidente Gloria Macapagal-Arroyo samtang magpadayon ang paghusay sa kaso nga gipasaka batok kaniya nga naglambigit sa eleksyon.

Mao kini ang makadaut kanato kay dunay pagpinig. Abi kay dakung opisyal ang sinumbong hatagan og maayong pagtagad. Mahimong dili mahadlok ang uban nga opisyal sa kagamhanan nga mohimo’g binuang kay kun makasohan hatagan man og special nga pagtagad.

Dili usab ko pabor sa sugyot nga ibutang lang siya ubos sa “House Arrest” kon anha ra tanggonga sulod sa iyang balay. Lisud kaayo sa mga gwardya ang pagsiguro nga dili siya makaikyas.

Kun gusto nga moikyas ang tawo nga ibutang sa “House Arrest” sayon ra kaayo. Mahimong maghimo ra kini og tunnel nga molusot sa pikas balay og lisud nga mabantayan kay dili man nila makita kanunay ang sinumbong. Lahi kun ang sinumbong anha tanggonga sa prisohan nga makita siya kanunay ug dili basta-basta nga makapuga kay ang ilawom sa prisohan gihanigan man og daghang puthaw.

Dili makiangayon sa mga kabus nga lumolupyo nga bisan gamay ra kaayo’g nahimong salaud prisohon g’yud. Kun ibutang nato nga ang argumento sa mga abogado ni Arroyo nga masakiton ang ilang kliyente, kadaghang masakitong priso diha uy.

Dinhi lang sa Sugbo, napublikar man gani sa mantalaan nga dunay piniriso nga miatubang sa arraignment sa iyang kaso nga giyayongan unya dunay dextrose.Dili ba “unfair” kaayo sa maong piniriso kun si Arroyo panggaon sa kagamhanan?

* * *

Uy, nakabantay ko nga ang mga tindera’g imahen sa mga santos likud nga bahin sa Basilica del Santo Niño migawas na usab sa puthaw nga railings ug anaa na maglingkod sa karsada.

Dugay ra ko nga nakabantay niini apan akong gipanid-an kay basin og pipila ra kadto ka adlaw, apan pwerte nang dugaya. Angay na tingali nga tagdon kini sa mga sakop sa Squatters Prevention Encroachment Elimination Division (SPEED) kay mora’g miabuso na sab sila.

Ang gikasabotan nga gitugotan na sila pagpaninda, ilabi na diha dapit sa eskena Osmeña Boulevard ug D. Jakosalem mao nga dili sila mogawas sa puthaw nga railings. Sa unang mga buwan mitahud g’yud sila, apan sa ngadto-ngadto, miabuso na usab.

Bi, palihug ibalik ninyo ang naandang sistema. Kay unya bitaw og atakehon na mo sa mga sakop sa SPEED kusog kaayo mo nga magpalaban.

* * *

Dunay polis nga nadistino sa Tourist Police, kanang unit diha sa City Hall nga nasundan nako nga nag-drive og motorsiklo nga walay plate numbers, unya wala pa gayo’y suga ug walay side mirrors.

Awhagon nako kining maong polis nga ayaw pagpalabi og abuso. Kamong mga polis isip mga tigpatuman sa balaud angay nga maoy magsilbi nga ehemplo ngadto sa katawhan, dili kay maoy mag-una paghimo’g abuso.

Basin nagtoo ka nga lisensya na nimo ang imong pagka polis nga dili motuman sa balaud. Palihug lang kay mauwaw tawon ta. Tiaw mo nag-drive ang maong polis sa motorsiklo nga nag-uniporme.

Wala ka mauwaw sa imong gihimo? Tawgon nako ang atensyon sa hepe sa Tourist Police nga hatagan niya kini’g aksyon ang akong reklamo. Ang mga polis nga ingon niini og batasan dili haum nga magpabilin sa serbisyo. Nagdali ko niadtong Lunes sa hapon kay gikan ko sa Budget Conference sa City Hall mao nga wala na lang ko magtagad kay apiki na ko’s panahon.